Foto: parlam.kz
Ýákiletti organdar mas kúiinde jasalyp, adam ólimine ákelgen jol-kólik oqiǵalary úshin jaýapkershilik tetikterin túbegeili qaita qarap, jasalǵan áreketterge sai jaza merzimderin belgileý jóninde usynystar engizýi tiis, dep esepteidi Májilis depýtaty Aidos Sarym. Ol bul rette halyqaralyq tájiribege súienýge bolatynyn aityp otyr, dep habarlaidy Ult.kz.
"Jýyrda Almaty qalasyndaǵy Ál-Farabi dańǵyly boiynda oryn alǵan qaiǵyly oqiǵa bizdi taǵy da bir mańyzdy ári ótkir suraqtyń aldyna qoidy: qylmyskerler men quqyq buzýshylarǵa laiyqty jaza taǵaiyndaýǵa arnalǵan quqyqtyq tetikterimiz jetkilikti me?
Apatqa aiyptalýshynyń áreketi úsh adamnyń ómirin qidy. Balalar ata-anasyz qaldy, al ata-analar óz balalarynan aiyryldy. Bul qaiǵy olardyń otbasylarynyń taǵdyryn tas-talqan etti. Endi olardyń ómiri eshqashan burynǵydai bolmaidy.
Shynyn aitý kerek, mundai qaiǵyly jaǵdailar árqaisymyzda dármensizdik sezimin, alańdaýshylyqty, ózimizdiń jáne jaqyndarymyzdyń ómiri men qaýipsizdigine degen úreidi týdyrady", - deidi depýtat.
Aidos Sarymnyń pikirinshe mundai oqiǵalar qoǵamda senimsizdik pen kúmándi kúsheitip, qoǵam men bilik arasyndaǵy alshaqtyqty tereńdetedi, zań men tártiptiń tiimdiligine degen senimdi álsiretedi.
Sonymen qatar depýtat ákimshilik amnistiia bastamasynyń qoǵam tarapynan oń qabyldanǵanyn atap ótti. Kóptegen sarapshylar men azamattyq qoǵam ókilderi bul qadamdy áleýmettik osal toptarǵa qoldaý kórsetýdiń bir tetigi jáne «Ádiletti Qazaqstan» qurý jolyndaǵy mańyzdy sheshim retinde baǵalap otyr.
Alaida ol keibir azamattardyń júrgizýshi kýáliginen aiyrylǵan adamdardy amnistiia aiasynda qaita kólik júrgizý quqyǵymen qamtamasyz etý týraly talaptaryna qarsy ekenin ashyq aitty. Depýtattyń sózinshe, mundai tulǵalardyń basym bóligi jol qozǵalysy erejelerin júieli túrde buzǵan, mas kúiinde kólik basqarǵan jáne ózge de qaýipti áreketterge barǵan.
"Mundai adamdarǵa qaitadan rólge otyrýǵa múmkindik berý – qoǵam qaýipsizdigine tikelei qater tóndirýmen teń", – dedi ol.
Aidos Sarym amnistiia – memleket pen qoǵamnyń gýmanistik aktisi ekenin, alaida bul qaǵida adam ómirine qaýip tóndiretin áreketterge qoldanylmaýy tiis ekenin atap ótti. Onyń pikirinshe, zań qabyldaý barysynda eń basty suraq – bul sheshim azamattardyń ómirin qaýipsiz ete me degen másele bolýy kerek.
Depýtat sóz sońynda zań shyǵarýshy organnyń basty mindeti – quqyq buzýshylardy aqtaý emes, kerisinshe jańa qylmystar men qaiǵyly oqiǵalardyń aldyn alý ekenin jetkizdi.
