Belgili aktrisa Bibigúl Aqtan Qazaqstanǵa shekaradan óte almaǵanyn aitty. Bul týraly ol Instagram-paraqshasynda jariialady, - dep habarlaidy Tengrinews.kz.
Aktrisa 3 tamyzda túnde Qazaqstan-Qyrǵyzstan shekarasyndaǵy Qarasý ótkizý beketi arqyly elge kirmek bolǵan. Alaida shekarashylar ony ótkizýden bas tartqan. Bibigúl Aqtannyń aitýynsha, bul osymen ekinshi jaǵdai. Ol Qazaqstanǵa osymen eki ret kirgizbei qoiǵanyn aityp, shaǵymdandy.
"Maǵan elge kirýge negiz joq dep aitty. Sonda barlyq týysym Qazaqstanda turatyny, Almatyda týylǵanym jáne ultym qazaq bolǵany jetkiliksiz be? Sumdyq, bul meni qatty qynjyltty", - dep jazdy ol.
Keiin Tengrinews.kz tilshisimen áńgime barysynda aktrisa Resei azamattyǵy bar ekenin túsindirdi. Onyń aitýynsha, qazir Qazaqstanǵa qatty qajettilik bolsa ǵana kirýge bolady. Mysaly, jaqyn týystaryna barý nemese meditsinalyq tekserýden ótý qajet bolsa.
"Almatyda týǵan aǵam men ápkem turady. Men olardyń týý týraly kýáligin jáne ózimdikin kórsetpek bolǵanmyn. Biraq men aǵam men ápkem jaqyn týystar sanatyna jatpaitynyn bilmedim. Oǵan ata-ana, áieli/kúieýi nemese balalary kiredi eken. Sondyqtan shekarashylar maǵan elge kirýge negiz jetkiliksiz ekenin aitty. Men olardy kinálamaimyn, bul olardyń jumysy. Ókinishke qarai, bul meniń osy saparǵa daiyndyq barysynda Qazaqstanǵa kirý erejelerimen jaqsy tanys bolmaǵanymnan", - dedi Aqtan.
Ol keiin Qyrǵyzstanǵa oralǵan. Endi aktrisa qajetti qujattardy rásimdeýge tyrysatynyn nemese shetelde qalatynyn aitty.
