Foto: ashyq derekkóz
Aqtóbede tanymal rep-oryndaýshy Qarakesek-ke qatysty qylmystyq is sotqa joldandy. Óner iesine esirtkige bailanysty aiyp taǵylyp otyr, dep habarlaidy Ult.kz.
Eske salaiyq, 31 jastaǵy ártis, shyn esimi Omar Amantaev, ótken jyldyń jazynda politsiia tarapynan ustalǵan bolatyn. Meditsinalyq saraptama onyń kólikti esirtkilik masań kúide basqarǵanyn rastaǵan. Sol kezde sot sheshimimen ol 7 jylǵa júrgizýshi kýáliginen aiyrylyp, 15 táýlikke ákimshilik qamaýǵa alynǵan edi.
Alaida is munymen shektelmegen. Ustaý kezinde onyń janynan untaq tárizdi zat salynǵan zip-paket tabylǵan. Osyǵan bailanysty QR QK-niń 296-baby 3-bóligi («Esirtki quraldaryn, psihotroptyq zattardy, olardyń analogtaryn ótkizý maqsatynsyz zańsyz ainalymy») boiynsha qylmystyq is qozǵaldy. Is Aqtóbe qalasynyń №2 sotyna túsken.
Belgili bolǵandai, aiyptalýshy is materialdarymen tanysyp shyqqan. Sot QR QPK-niń 67-baby 1-bóligine sáikes oǵan Aqtóbe oblystyq advokattar alqasy arqyly qorǵaýshy taǵaiyndaý qajettigin qaýly etken.
Taǵylǵan aiyp boiynsha Amantaevqa 865 myń teńge kóleminde aiyppul salý, sol mólsherde túzeý jumystary, 200 saǵatqa deiin qoǵamdyq jumystarǵa tartý nemese 50 táýlikke deiin qamaý jazasy taǵaiyndalýy múmkin.
Aita keteiik, Qarakesek – qazaqtildi aýditoriiaǵa keńinen tanymal rep oryndaýshy. Onyń YouTube jelisindegi «Qýraǵan gúl» jáne «Kóbelek» syndy lirikalyq trekteri milliondaǵan qaralym jinaǵan.
