QR Premer-ministriniń orynbasary Gúlshara Ábdiqalyqova bastaǵan áleýmettik blogynyń birinshi basshylarynan quralǵan jumys toby kópbalaly, muqtaj otbasylardyń turyp jatqan mekenjaiyna bardy. Búgin bir muqtaj otbasyǵa kásipkerdiń úi satyp alyp beretini belgili boldy, dep habarlaidy "Ult aqparat".
Gúlshara Ábdiqalyqova bastaǵan top birneshe otbasynyń jaldamaly páterine baryp, olardyń jaǵdailarymen tanysty. Solardyń biri - Estemisovter otbasy.
«Munai kompaniialaryna injenerlik jeliler tartyp berýmen ainalysatyn seriktestikte 80 adam jumys isteidi. Jumysshylardyń 60 paiyzy oralman. Biz bir otbasynyń balalaryndai birgemiz, jumysshylaryma nesie aldyrmaimyn. Qajet bolsa kompaniiadan paiyzsyz aqsha bólip, jalaqynyń bir bóligin tólep otyrýǵa múmkindik jasaimyn. Jyl saiyn 2-3 otbasy úi salady. Úkimet toby kelip, tanysqan otbasynyń biri meniń kompaniiamda jumys isteidi. Qanat Sadyqov taiaýda ǵana jumysqa ornalasty. Kópbalaly otbasyǵa úi alyp berýge sheshim qabyldap otyrmyz», - dedi «Aqtóbe munai gaz» JShS-nyń direktory Serik Estemisov.
Premer-ministrdiń orynbasary Gúlshara Ábdiqalyqova kásipkerge rizashylyǵyn bildirdi.
«Otbasyna baryp, jaǵdaiymen tanystyq. 10 jyl buryn Qazaqstanǵa kóship kelip, ár jerde turǵan. 4 balasy bar, kúieýi jumys isteidi, áieli balalaryn baǵyp otyr. Osyndai otbasyǵa kómekteskenińiz úshin alǵys aitamyn», - dedi Gúlshara Ábdiqalyqova.
Jiyn kezinde qurylys kompaniiasynyń basshysy Shamil Kaspranov ta 7 balaly otbasyǵa páter syilaitynyn aitty. Qurylys kompaniiasynda jumys isteitin Baqytjan Aqberlievke 2 bólmeli páter berildi.
Aita keteiik, Shamil Kaspranov sý tasqyny kezinde óz jumysshylaryna páter syilap, jetim balalarǵa qamqorlyq kórsetip júr.
