Áskeri tergeýshiler Aqtóbedegi áskeri bólimniń qyzmetkerlerine qatysty is qozǵady. Atyshýly teraktige qatysty jańa derekter KTK telearnasynyń beinematerialynda aitylady.
Osy istegi figýranttardyń biri sol kúni kezekshilik atqarǵan Qairat Tastanbekov ekeni anyqtaldy. Ol úsh ai boiy iske kýáger retinde tartylyp, oilamaǵan jerden kúdiktige ainalǵan. Ol qazirgi ýaqytta barlyq instantsiialarǵa shaǵym túsirip jatyr.
"5 maýsymda lańkester basyp kirgende osy áskeri bólimde qandy oqiǵa boldy. Osyndai tótenshe jaǵdai bolǵandyqtan, barlyq organga - oblystyq IID, Oralda ornalasqan "Batys" óńirlik bólimshesine habar berýimiz qajet bolatyn. Lańkesterdiń qolastynda bolyp, olardyń aitqan sharttaryn oryndadym", - dedi áskeri qyzmetker.
Qairat Tastanbekov © ktk.kz
Teraktiden keiin sol kúni kezekshilik etken barlyq ofitser, sondai-aq, maior Tastanbekov te jaýap alýǵa shaqyryldy. Áskeri bólimsheniń basshylyǵy da sol kezde tez arada aýysyp ketken. Tastanbekov te jumystan óz erkimen ketip, tergeýshilerge baryp júrdi. Al jaqynda ol óziniń oilamaǵan jerden aiyptalýshyǵa ainalyp ketýi múmkin ekenin bildi.
"Kesheden bastap men osy iste kúdiktige ainaldym. Ary qarai ne bolatynyn bilmeimin. Qazir bultarpaý sharasy arqyly qamaýǵa alýy da múmkin. Munda ne bolyp jatqanyn halyq bilsin", - dedi Tastanbekov.
Al maiordyń áieli kúieýiniń qamaýǵa alynýy múmkin ekenin estigende abdyrap qaldy. "Oqiǵa ornynda bolǵandardyń barlyǵy jumystan qýyldy. Qaza taýyp, jaraqat alǵandar - naǵyz batyrlar. Meniń kúieýim kúdiktige ainaldy. Bir jyl bir ailyq balamyz bar", - dedi Madina Tastanbekova.
Ofitserdiń otbasy ekinshi sábidi kútip otyr.
Aita keteiik, áskeri tergeýshiler osy iske qatysty pikir bildirmei otyr. Olar tek Tastanbekovtiń osy istegi figýranttardyń biri ekenin rastady. Ol QR Qylmystyq kodeksiniń 447-baby boiynsha ("Ishki qyzmet atqarýdyń nemese garnizonda patrýl bolýdyń jarǵylyq qaǵidalaryn buzý") kúdikti dep tanylyp otyr. (Derekkóz - KTK).
