Aqtóbe aialdamalary bir tipti bolýy múmkin. Bul týraly búgin qala ákimi Mavr Abdýllin aitty, dep habarlaidy QazAqparat.
Aqtóbe qalasyndaǵy aialdamalardy aýystyrý jumysyn burynǵy ákim Iliias Ispanov bastaǵan bolatyn. Alǵashynda ár aialdamanyń quny 1,5 million teńge dep bekitilip, keiin jumysty atqaratyn merdiger árqaisysyn 1,1 million teńgege ornatty.
Alaida aqtóbelikter jazda ystyqtan qorǵamaityn aialdamalarǵa shaǵym aityp, kóleńke bolýy úshin shatyryna qara qaǵaz japsyryldy. Qazir de qoǵamdyq kólik oryndaryna shaǵym bar.
Oblys ákimi Ońdasyn Orazalin men qala ákimi Mavr Abdýllin qala ishindegi qoqystyń jinalýyn, kópir qurylysy men turǵyn úi qurylysyn qaraý kezinde bul máseleniń de sheshiletinin jetkizdi.
«Aialdamalardyń syzbasy daiyndalyp, biz halyqqa tańdaý jasaýǵa múmkindik beremiz. Iaǵni, daiyn bolǵan soń kórsetip, eń durysyn tańdaimyz, sony qalaǵa ornatamyz. Aialdamalar bir tipti bolady. Qala boiynsha taǵy 600 aialdamada arnaiy kútý orny joq. Bul másele de sheshimin tabady», - dedi qala ákimi Mavr Abdýllin.
Aita keteiik, bul jumystardyń qai ýaqytta qolǵa alynatyny, qazirgi áinek aialdamalar qaida jiberiletini áli belgisiz.
