«Jańatas Aqtóbe» JShS-i óndirgen qiyrshyqtasty tasymaldaǵan jumysshylar eńbekaqysyn daýlap oblys ákimdigine bardy, dep habarlaidy QazAqparat.
Aqtóbe oblysy, Shalqar aýdany, Bershúgir aýylyndaǵy óndiris ornynda qiyrshyq tas shyǵarǵan «Jańatas Aqtóbe» JShS-niń jumysshylary jalaqysyn daýlap, birneshe ret ákimdikke bardy.
Oblys ákimdigi «Jańatas Aqtóbe» kompaniiasynyń jer qoinaýyn paidalaný quqyǵy «Temir Tas» JShS-ne berilgenin, jumysshylar aldyndaǵy qaryz 21-qyrkúiekke deiin óteletinin habarlady.
Biraq qaryz túgel ótelmeitin siiaqty. Sebebi berejaq 12 milliard teńgege jetken.
«Zań boiynsha eń aldymen biz jalaqyny tóleýimiz qajet. Al búgin ákimdikke kelgen adamdar zaýytqa qyzmet kórsetken, qiyrshyq tas tasymaldaǵan kásipkerler. Kásiporynǵa birneshe múmkindik berilgenimen tyǵyryqtan shyǵa almady. Bir ǵana bank aldyndaǵy qaryzy 7 milliard teńgege jetken. Jalpy 12 milliard teńge qaryz», - dedi oblys ákiminiń orynbasary Qairat Bekenov.
Jumysshylar sotqa aryz berip, sot sheshimi kásipkerlerdiń paidasyna sheshildi. Qyzmet kórsetýshiler qujattarymen «Jańatas Aqtóbe» kompaniiasyna barǵanymen bankrot bolýdyń aldynda turǵandyqtan zaýyt aqsha joq dep keri qaitarǵan. Eki ortada qalǵan tasymaldaýshylar endi sot oryndaýshylaryna úmit artady.
«Jańatas Aqtóbe» kompaniiasynda ońtailandyrý júrip jatyr. Qazirgi kezde sot oryndaýshylary kompaniianyń Bershúgir stansasyndaǵy temirjol jolaǵyna, zaýyttyń karerine tyiym saldy. Ońtailandyrý isi aiaqtalǵan soń múlki baǵalanyp, túsken aqsha jalaqyǵa, qyzmet kórsetý aqysyna beriledi», - dedi oblystyq ádilet departamenti basshysynyń orynbasary Azamat Berdibekov.
Barlyǵy onǵa jýyq tasymaldaýshy 1-11 million teńge aralyǵynda aqsha alýy tiis. «Jańatas Aqtóbe» kompaniiasy keńsesin jaýyp tastasa, «Temir Tas» JShS-i bul suraqtyń ózderine qatysy joq ekenin eskertken.
«2019 jyldyń maýsym aiynda jer qoinaýyn paidalaný quqyǵy bizge aýysty. Kelisimshartta jumysshylardyń jalaqysy men salyqty tóleý mindetteldi. Biz 12 milliard teńge qaryzdy qabyldaǵan joqpyz. Qazir óz mindetimizge alǵan aqshany tólep jatyrmyz. Qyrkúiek aiynyń sońyna deiin 10 million teńgege jýyq aqshany aýdaramyz. Bizge jalaqysyn surap 89 adam ǵana habarlasty», - dedi «Temir Tas» JShS-niń atqarýshy direktory Aleksando Tsoi.
Aita keteiik, Aqtóbe oblysy boiynsha 13 kompaniia jumysshylaryna 213 million teńge qaryz. Iaǵni, 370 adam eńbekaqysyn ýaqytyly almaǵan. Ásirese bankrot bolatyn bes kompaniianyń qaryzy 89 million teńge. Berejaq kompaniialar arasynda Aqtóbe metall qubyrlar zaýyty, qoqys jinaýmen ainalysqan «Taza qala» kompaniiasyn men shaǵyn munai óńdeý zaýyty bar.
