Aqtóbede turaqtandyrý qorynan satylymǵa shyǵarylǵan kartop sapasy kópshiliktiń synyna ushyrady. Qazir shirigen, buzylǵan kókónistiń qalai sórege jiberilgeni tekserilip jatyr, dep habarlaidy QazAqparat.
«Aqtóbe áleýmettik-kásipkerlik korporatsiiasy» AQ biyl turaqtandyrý qoryna 1268 tonna kartop saldy. Sharýalardan ár kelisin 62 teńgege satyp alǵan korporatsiia kartopqa 78 mln teńge jumsady.
«Turaqtandyrý qoryna salynǵan azyq-túlik iri sýpermarketter men áleýmettik dúkenderge qoiylady. Kelesi aptada kartop, qyryqqabat, sábiz ben piiaz «Tabys» kommýnaldyq bazaryna jáne sýpermarketterge túsedi. Sapasy týraly aitar bolsam, depýtattar qoimaǵa baryp, qarap shyqty. Únemi baqylaýda. Sapasyna monitoring júrgiziledi. Biz «Gala» tuqymdy sary tústi kartopty saqtandyrý qoryna satyp aldyq. Bálkim almastyryp qoiǵan shyǵar, ol tekseriledi», - dedi «Aqtóbe» áleýmettik-kásipkerlik korporatsiiasy» AQ basqarma tóraǵasynyń birinshi orynbasary Anýar Asylov.
Keiin ol tilshilermen birge qaladaǵy sýpermarketti aralady. Onda búlingen, túsi qyzyl kartop satylymda tur.
«Mynaý turaqtandyrý qoryna salynǵan kartop emes. Men sizdermen birge kelip, jańa kórip turmyn», - dedi Anýar Asylov.
Aita keteiik, saqtandyrý qoryndaǵy kartop qazir dúkenderde kelisine 84 teńgeden satylyp jatyr.
