Aqtóbe oblysy aýmaǵynda 22 vagon relsten shyǵyp ketti. Tsisterna ishindegi janar-jaǵarmai tógildi, dep habarlaidy QazAqparat.
Aqtóbe oblysy, Shalqar aýdany Ulpan stantsiiasynda 22 vagony relsten shyǵyp ketti . Jedel túrde oqiǵa ornyna «QTJ» UK AQ-nan 65 qyzmetker jáne 2 qalpyna keltirý, 2 órt sóndirý poiyzy, tótenshe jaǵdailar departamentinen 9 qyzmetker men 3 birlik tehnika jumyldyryldy.
«Relsten shyqqan 13 tsisternanyń jeteýindegi benzin, dizeldi otyn men kerosin tógildi. Rels boiyndaǵy elektr togy sóndirildi, órt shyqpas úshin tótenshe jaǵdailar qyzmeti arnaiy kóbik shashty. Endi eki rels baǵytynyń birin qalpyna keltirip, jolaýshylar qatynasyn jandandyrý qajet. Mamandar qalpyna keltirý jumysyn jalǵastyryp jatyr», - dedi oblystyq TJD bastyǵy Marǵulan Amanbaev.
