Aqtóbede jol apaty bolyp, eki mektep direktory kóz jumdy, dep habarlaidy "Ult aqparat".
Aqtóbe oblystyq politsiia departamenti baspasóz qyzmetiniń habarlaýynsha, oqiǵa keshe saǵat 20:20-da bolǵan. Oiyl aýdanynyń 102 telefonyna Oiyl-Qobda avtojolynyń 156 shaqyrymynda kóliktiń aýdarylǵany týraly habarlama túsip, salonda júrgizýshini qosa alǵanda 4 áieldiń bolǵany aityldy.
«Toyota Land Cruiser Prado kóliginiń júrgizýshisi Oiyl aýylynan Qobda aýylyna qarai baǵyt alyp, jol qozǵalysy erejesin buzyp, kólikti basqara almai qalǵan. Avtokólik sol jaqqa qarai aýdaryldy. Nátijesinde júrgizýshi men bir jolaýshy alǵan jaraqatynan oqiǵa ornynda kóz jumdy. Taǵy eki jolaýshy birneshe jaraqatpen Oiyl aýdandyq ortalyq aýrýhanasyna jatqyzyldy. Atalǵan derek boiynsha QR QK 345-baby 3-bóligi boiynsha sotqa deiingi tergeý bastaldy», - dedi oblystyq PD baspasóz qyzmetiniń jetekshisi Erbolat Sarqulov.
Aita keteiik, kólik júrgizýshisi de, jolaýshylar da - Aqtóbe qalasyndaǵy mektepterdiń direktory. Qazir zardap shekken eki áiel aýrýhanada jatyr.
