Aqtóbe qalasyndaǵy avtobýstarǵa elektrondy tólem júiesin engizý jumystary jalǵasyp jatyr. Iaǵni, budan keiin kez kelgen bank kartasy arqyly jol júrý aqysyn tóleýge bolady.
Qala ákimi Mavr Abdýllinniń aitýynsha, «PATP» JShS-niń 8 marshrýtynda validator ornatylǵan. Qyrkúiek aiynyń 25-ne deiin «PATP» avtobýstarynyń barlyǵynda osy júie iske qosylady.
«Biz qazirgi ýaqytta banktermen kelissóz júrgizip jatyrmyz. Turǵyndar tólemdi 3-6 aidyń ishinde bank aýdarymymen tóleýdi úirený úshin kartaǵa tólem somasynyń jartysy qaitarylady. Biz sodan keiin 1 qańtarǵa deiin bekitilgen tarifti engizemiz. Jolaýshylar kartochkalyq tólem jasasa bir soma kóleminde bolady. Eger qolma qol tólem jasaityn bolsa áldeqaida qymbat. Bul rette, jol júrý aqysyn elektrondy túrde tóleý protsesi senimdilikke, tasymaldaýshy kompaniialarǵa qyzmetkerlerdiń jalaqysyn kóterýge múmkindik beredi», - deidi qala ákimi.
Sondai-aq Aqtóbe oblysy ákimi Ońdasyn Orazalin qaladaǵy qoǵamdyq kólikterdegi elektrondy tólem júiesi protsesin baqylaý úshin №46 avtobýsqa arnaiy otyryp, «Ushý ýchilishesi» aialdamasynan «Sazdy» aialdamasyna deiin bardy. Óńir basshysy qoldanystaǵy elektrondy tólem júiesiniń áli de jetildirý kerek tustaryn tilge tiek etti.
«Avtobýsqa kartochkalyq tólem jasaǵanda azdaǵan qolaisyzdyqty baiqadym. Naqtyraq aitqanda, kartochkalyq tólem jasaityn validator kondýktorda bolmaýy kerek, ol bólek ornalasqany durys. Sonymen qosa qaǵaz júzindegi chek qanshalyqty qajet? Mine, osy sekildi azdaǵan máselelerdiń barlyǵyn tehnikalyq turǵyda qarastyrý kerek», - deidi oblys ákimi.
Sonymen qatar oblys ákimi qaladaǵy aialdamalardy jaqsartýdy, júrgizýshiler men kondýktorlarǵa ádemi forma kiiýdi jáne jalpy qyzmet kórsetý mádenietin jaqsartýdy tapsyrdy. Ońdasyn Orazalin qoǵamdyq kólikpen júrý aqysynyń joǵarylamaitynyn jáne eski avtobýstar jańaǵa aýystyrylatynyn da atap ótti.
Aita ketsek, aimaqta kólik jáne kommýnikatsiia salasyn tsifrlandyrý boiynsha birqatar jumystar qolǵa alynǵan. Qazirgi tańda qaladaǵy 350 avtobýsqa GPS-treker ornatylyp, «AktobeBUS» mobildi qosymshasy iske qosylǵan. Qosymshany qala turǵyndary Play market nemese App Store arqyly júktep alyp, avtobýs baǵyttary men qozǵalystaryn baqylai alady.
