Aqtóbe oblystyq qylmystyq ister jónindegi mamandandyrylǵan aýdanaralyq sotynda 16 jastaǵy oqýshy qyz ben onyń 18 jastaǵy jigitine qatysty alǵashqy otyrys ótti. Olarǵa Qylmystyq kodekstiń «Adam óltirý» baby boiynsha aiyp taǵyldy, dep habarlaidy QazAqparat.
«Jábirlenýshi 2022 jyldyń 14 sáýiri kúni saǵat 21:00-den óte qyzynyń jigitin úiine shaqyryp, shaǵyn jóndeý jumystaryn jasap berýdi suraidy. Jýynatyn bólmedegi burandalardy aýystyrý keregin aitady. Sol kúni aiyptalýshy jigit saǵat shamamen 23:00-de úi jumystaryna kómek kórsetý úshin barǵan. Birazdan soń úi iesi urys shyǵarady. Kiim ilgishtegi ilmektiń durys emestigi janjal týyndatqan. Ishimdik ishken áiel jigittiń qyzymen aradaǵy qarym-qatynasyn quptamaitynyn da jetkizgen. Daý tóbeleske ulasqan. Sol kezde aiyptalýshy jábirlenýshiniń oń qolynan ustap, júrek tusyna bir ret pyshaq suqqan. Munan soń ony býyndyra bastaǵan. Sol kezde janynda turǵan qyzdan kómektesýdi surady. Sebebi, jábirlenýshi ol kezde tiri edi. Qarsylyq kórsetken. Qyz kishkentai kezinde ózine zábir kórsetken anasyn aiamai, pyshaqty alyp, birneshe ret suǵyp alady. Sóitip, múrdeni jasyrýdy oilaidy», - dedi memlekettik aiyptaýshy sot otyrysy kezinde.
Aiyptaý qorytyndysyna súiensek, ekeýi 19 sáýirge deiin deneni balkonda saqtaidy. Dene buzylmas úshin oǵan ýksýs quiyp, soda sepken.
«Kináni moiyndaimyn. Biraq, qylmysty ózim jasadym. Ashý ústinde. Qorqyp, eshkimge aitpadym. Keiin aǵama habarlastym, ol politsiia shaqyrdy», - dedi 18 jastaǵy jigit.
Aqtóbe qalasy Almaty aýdandyq prokýratýrasy anasyn óltirgen oqýshy men onyń janynda bolǵan jigitke qatysty isti tergep, sotqa jiberdi. Prokýratýranyń habarlaýynsha, aiyptaý aktisi kezinde olarǵa qatysty bap ózgertildi. Is Qylmystyq kodekstiń 99-baby 2-tarmaǵy, iaǵni top bolyp jasaǵan qylmysy úshin sotqa joldandy.
