Aqtóbe oblysynda «Ashyq esik kúnderi» keń aýqymdy aktsiiasynyń nátijesinde áleýmettik kómekke muqtaj 877 otbasyǵa jalpy somasy 50 mln teńgege qajetti kómekter kórsetildi.
Bul týraly oblys ákimi Ońdasyn Orazalin úkimettiń jumys tobynyń halyqtyń áleýmettik jaǵynan osal toptarymen kezdesýi kezinde jetkizdi.
«Nur Otan» partiiasynyń sezinde Elbasy áleýmettik saiasat salasyndaǵy sharalardyń iske asyrylýyn egjei-tegjeili qarastyryp, turmysy nashar jáne áleýmettik turǵydan az qamtylǵan turǵyndarǵa qoldaý kórsetý jóninde jańa aýqymdy sharalar usynǵan bolatyn. Elbasynyń sezde kótergen máseleleri Aqtóbe oblysynda da ózekti. Sondyqtan berilgen tapsyrmalardy sapaly jáne ýaqytyly júzege asyrý – bizdiń negizgi, basty mindetimiz»,- dedi oblys ákimi.
Ol kópbalaly jáne az qamtylǵan otbasylardyń áleýmettik máselelerin sheshýge baǵyttalǵan sharalardyń óńirde júzege asyrylyp jatqanyn atap ótti.
«Áleýmettik turǵydan turmysy tómen otbasylardy qoldaý maqsatynda ústimizdegi jyldyń 8 aqpanynan bastap Aqtóbe oblysynyń ákimdiginiń uiymdastyrýymen «Ashyq esik kúnderi» aktsiiasy uiymdastyryldy. Atalǵan aktsiia aiasynda oblystyń 5193turǵyny jolyǵyp, 6028 suraq qoiyldy. Turǵyndarmen kóterilgen suraqtardyń negizi turǵyn úi, nesielerdi óteý, memlekettik jeńildikterdi alý máselesine qatysty»,- dedi Ońdasyn Orazalin.
Suraqtardyń deni jedel sheshilip jatty. Onyń ishinde 1469 suraq oń sheshimin taýyp, 4307 suraqqa túsindirme berildi. 264 suraq jumys barysynda baqylaýda tur. Asa muqtaj otbasylarmen jumystaný úshin óńirde quramyna depýtattar, qoǵam belsendileri, kásipkerler men memlekettik qurylym ókilderi kirgen mobildi toptar jumys jasady. Olar júgingen kisilerdiń turmys jaǵdaiymen tanysyp, sol otbasyǵa qandai naqty kómek kórsetý kerektigin bilý úshin mekenjailaryna bardy.
Jalpy, aktsiia kezinde kásipkerlerdiń demeýshilik qoldaýymenáleýmettik kómekke muqtaj 877 otbasyǵa jalpy somasy 50 mlnteńgege qajetti kómekter kórsetildi.
Kezdesýde sondai-aq, Aqtóbe oblysynda ataýly áleýmettik kómek (AÁK) alatyndar sany bir jarym ese artatynyn jetkizdi. Eger 2018 jyly 20 083 adam jalpy somasy 717 mln teńge ataýly áleýmettik kómek alsa, 2019 jyly olardyń sany 29 237 adamǵa artady. Osy maqsatpen biyl biýdjetke 903 mln teńge bólingen, qosymsha respýblikalyq biýdjetten taǵy 3,5 mlrd teńge bólinbek.
