Aqtóbe oblysynda jel elektr stansasy salynady. Bul týraly Qazaqstannyń jańartylatyn energetikasy qaýymdastyǵynyń bas direktory Arman Qashqynbaev aitty, dep habarlaidy QazAqparat.
Elordada ótip jatqan Jańartylatyn energiia kózderi jónindegi III sammit aiasynda ol Qazaqstanda kún, jel jáne sý energetikasynan bólek bio jáne geotermaldy energetikany damytý josparda bar ekendigin aitty.
«Qazirgi ýaqytta halyqaralyq investorlar tarapynan úlken qyzyǵýshylyq bar. Degenmen, olardy Qazaqstanǵa tartyp, jańa stansa salǵan kezde qazaqstandyq qamtý jaiyn da umytyp ketýge bolmaityndyǵyn barlyq ýaqytta aityp otyramyz. Ótken jyly jańartylatyn energiia kózderiniń úlesi 1,3 paiyzdy qurady. 900 MVt-dan astam qýat kózi ornatyldy. Jambyl oblysynyń Býrnyi aýylynda jáne Almaty oblysynda Qapshaǵaida qýaty 100 MVt bolatyn úlken kún stansasy jumys istep tur. Tipti, Qaraǵandy oblysyndaǵy Saranda nemister kún stansasyn saldy. Osy oraida klimaty sýyq atalǵan óńirde kún elektr stansasy salyndy degen saýal týyndaýy múmkin. Kún paneli tetikteri avtomobil nemese basqa da apparattarmen birdei. Sýyq bolǵan jaiyn jabdyq qyza túsedi. Iaǵni, sýyq klimatta da tiimdi jumys isteidi», - dedi ol.
Kún stansalaryn elimizdiń tek qana ońtústik qana emes barlyq óńirinde salý kerek degen oiyn jetkizgen qaýymdastyq basshysy Qazaqstanda aldaǵy ýaqytta salynýy josparlanǵan jobalarǵa da toqtaldy.
«Eń úlken qýaty 44 MVt bolatyn jel stansasy Aqmola oblysynyń Ereimentaý eldi mekeninde tur. Qazir eń úlken joba Aqtóbe oblysynda iske qosylady. Atalǵan óńirde halyqaralyq munai kompaniiasy qýaty 48 MVt-tyq jel stansasynyń jobasyn qarjylandyrdy. Ol taiaýda, kelesi ailardyń ishinde júzege asyrylady. Sonymen qatar jel stansalaryna qatysty jobalar Jambyl men Almaty oblystarynda da júzege asyrylyp jatyr», - dedi A.Qashqynbaev.
