Aqtóbe oblysynda búginge deiin 96 balaǵa koronavirýs infektsiiasy diagnozy qoiylǵan. Onyń 9-y virýstyń simptomdy túrine shaldyqqan, dep habarlaidy "Ult aqparat".
Aqtóbe oblysy boiynsha ótken táýlikte taǵy 120 adamnan koronavirýs infektsiiasy anyqtaldy. Onyń teń jartysynan astamy derttiń simptomdy túrine shaldyqqan. Búginge deiin óńirde 7 myńnan astam jaǵdai tirkelse, onyń 75 paiyzdan astamy jazyldy. Áli de 4400 adam úi karantininde otyr. Olar eki apta boiy dárigerler baqylaýynda bolýy tiis.
«Barlyǵy 96 baladan koronavirýs infektsiiasy anyqtalsa, onyń 9-y aýrýhanada jatyr. Báriniń jaǵdaiy turaqty, ómirine qaýip tónip turǵan joq. Jótelip, basy aýyryp, dene qyzýy kóterilip túsedi kóbi. Sonymen birge 8 júkti áiel pnevmoniiaǵa shaldyǵyp, aýrýhanaǵa jatqyzyldy. Taǵy 22 júkti kelinshek – úi karantininde. Biz kún saiyn monitoring júrgizemiz. Aýrýhananyń jansaqtaý bóliminde jatqandardyń 17 paiyzynyń jasy 50-ge tolmaǵan. Al 50-64 jas aralyǵynda 14 adam jatyr. 24 naýqastyń jasy 65-ten asqan. Jansaqtaý bólimine kóbine qant diabeti, júrek-qan tamyrlary, búirek, baýyr jetispeýshiligi, sozylmaly aýrýy bar adamdar túsedi», - dedi oblystyq Densaýlyq saqtaý basqarmasynyń basshysy Rústem Isaev.
Onyń aitýynsha, sońǵy kezderi jastar arasynda koronavirýs infektsiiasyn juqtyrý deregi kóbeidi.
«Kóbi úide em júrgizip, aýrýdy asqyndyryp alady. Bul – durys emes. Tipti estigen, surap bilgen dárini iship, júre beredi. «Qyzyl» aimaqta bolǵan soń, shekteý joǵary. Bala-shaǵany asyraý, jumys isteý týraly sóz jii qozǵalady brifingte. Biraq bárine shydam kerek. Tyǵyryqtan shyǵý úshin vaktsina alǵan durys. Jansaqtaý bóliminde qazir 47 adam jatyr. Olardyń otbasy jaǵdaidy jaqsy biledi, virýstyń qaýipti ekenin jan-tánimen túsinedi. Al dalada adamdardyń maska taqpai júrgenin bilemiz. Maska taǵý, qol jýý, araqashyqtyqty saqtaýǵa bilimge emes, jaýapkershilikke, sanaǵa bailanysty. Kúnde bir suraq qoiylady. «Vaktsina alý kerek pe?» dep suraidy. Jaýaby aityldy. Vaktsina indetten qorǵaýǵa, aýrýdy jeńil ótkerýge kómektesedi. Birinshi synyptyń oqýshysyna aitsaq, olar buljytpai oryndaidy. Al sonda biz avtobýsqa «maska taq» dep aityp otyratyn bir adamdy otyrǵyzýymyz kerek pe? Adamdar da jan-jaǵyndaǵylarǵa eskertýi tiis», - dedi Rústem Isaev.
