Aq jeide kiip kelińder, holi boiaýyn shashamyz!..
Aqsý qalasynyń 55 jyldyǵyna orai Jastar bastamalaryn damytý ortalyǵy mereke kúnine qatysýshylarǵa aldyn ala osyndai habarlandyrý jasapty.
Estimegen elde kóp. Sóitip, úndilerdiń bir-birine holi boiaýyn shashý oiynyna Aqsýdaǵy merekede 400-ge jýyq adam qatysypty. Qaladaǵy «Jastar bastamalaryn damytý ortalyǵy» jeti tústi holi boiaýyn tipti, arnaiy tapsyryspen Almatydan aldyrypty. Bul ne?..
Úndilerdiń «Holi» merekesi jaily internet betterindegi ańyzdarda «holi» sóziniń «holika» degen ázázildiń atyna bailanysty shyqqany aitylady. «Holi» úndilerdiń dini festivali. Bul kúni úndiler bir-birine túrli-tústi untaqtar laqtyryp oinap, naýryz aiynyń basynda úsh kún toilaidy eken. Holika perini jeńdik dep bir-birine boiaý shashady.
Qala ákimdigi eshqandai mádeni-rýhani baǵdarlamalar taba almaǵan ba, aqsýlyq jastar bir-birimizge holi boiaýyn shashyp oinasaq, 55 jyldyq mereitoida «Boiaýlar merekesi» barlyq qatysýshylardyń kóńil kúiin kóteredi depti. Ári boiaýlar qurǵaq, tez jýylyp, kiimde daq qaldyrmaidy. Festivalǵa qatysqysy keletinder aq jeide kiip kelýi kerek eken.
Al Aqsýdaǵy meshit imamdary úndilerdiń boiaý shashý oiynynyń musylman balasy úshin tyiym salynǵanyn bilmei me, sonda?! Ózge dinniń ózgesheliginen jastardyń boiyn aýlaq ustaý kerektigin eskertý kerek edi. Bir-biriniń bet-aýzyn túrli-tústi boiaýmen boiap, deneleri qyzyl-jasyl túske malynǵan jastar jyn qaqqandai sendelip, qandai bastamany damytyp júr, sonda? Bizdiń dinge, bizdiń dúnietanymǵa, qazaqy bolmysqa, salt-dástúrge qatysy joq úrdistiń ómirimizge entelei kirgeni jaqsy emes. Jastar kózderin asha almai, qyzyldy-jasyldy qurǵaq boiaýǵa kómilip, elimizde qabyldanǵan Máńgilik El, Uly Dala eli ideialaryn umyt qaldyrsa, bara-bara ne bolamyz?.. Iá, sóz joq, úndi eli – ǵajap el. Kinosyn bala kezden kórip, shaiyn iship óstik. Biraq, el aman, jurt tynyshta olardyń dini meiramyn toilap, Aqsýdyń jastaryn ne qara basty eken?!
Farida BYQAI,
