MTV USA arnasynda Dimash Qudaibergenniń qazaq tilindegi beinebaiany kórsetildi. Osylaisha Dimash – MTV arnasynan qazaq tilinde án salǵan tuńǵysh ánshi boldy, dep habarlaidy "Ult aqparat".
Telearnada jáne arnanyń YouTube-tegi resmi paraqshasynda «MTV’s Friday Livestream» baǵdarlamasynda Dimashtyń «Qairan Elim» ániniń beinebaiany kórsetildi.
Dimashtyń MTV-degi tusaýkeserin Dimash USA fan Club jankúierleriniń Instagram paraqshasynan tamashalaýǵa bolady.
Sonymen birge, AQSh-tyń Qazaqstandaǵy elshiligi de ánshi men onyń jankúierlerin amerikalyq arnadaǵy tabysymen quttyqtady.
«Dimash «MTV’s Friday Livestream» baǵdarlamasyndaǵy eń suranysqa ie ártis atandy», - dep jazdy elshilik.
Beinebaiandy MTV USA arnasynyń resmi YouTube jelisi arqyly álemniń kez-kelgen eli tamashalai alady.
«Meniń tyńdarmandaryma, álemniń ár túpkirindegi meniń ónerimdi baǵalaityn jankúierlerime shyn júregimmen alǵys aitamyn. Olar meniń bala armanymnyń oryndalýyna sebepker boldy. Qazaqstan ǵana emes, tórtkúl dúniedegi Dear-larymnyń qoldaýyna razymyn. Qurmetim men alǵysym sheksiz», – dep Dimash óz lebizin bildirdi.
Beinebaian Niý-Iork ýaqytymen juma kúni 17:00 men 20:00 aralyǵynda, al Nur-Sultan ýaqytymen túngi 03:00 men tańǵy 06:00 aralyǵynda kórsetildi. Bul – Amerikadadaǵy praim-taim ýaqyt. Dál osy ýaqytta MTV arnasyn eń kóp kórermen qaraidy.
