AQSh-tyń bas prokýrory Ýiliam Barr federaldy prokýror Djon Darem jumysynyń qorytyndysy boiynsha burynǵy prezident Barak Obama men burynǵy vitse-prezident Djo Baidenge qarsy qylmystyq is qozǵalaryna kúmán keltirdi.
Darem tergeýi ótken jyly bas prokýror Ýiliam Bardyń tapsyrmasy boiynsha bastalǵan. Bas prokýror "Donald Tramptyń sailaý aldy shtaby adamdarynyń Reseimen bailanysy boldy ma" degen máseleni tergeýdi bastaýdyń zańdy negizi bolǵanyna kóz jetkizýge sheshim qabyldaǵan.
Dúisenbide Barr prokýror Daremniń nazarynda burynǵy prezident pen vitse-prezident emes, "Resei izin" tekserý barysynda zańsyz áreket jasaýy múmkin "ózge" resmi tulǵalar turǵanyn málimdegen.
Sońǵy aptada prezident Tramp "Obamageit" dep ataityn, "AQSh tarihyndaǵy asa iri saiasi qylmys" dep sanaityn "janjal" týraly birneshe ret eske salǵan.
Reuters agenttigi Tramp saiasi qarsylastaryn qylmys jasady dep aiyptaǵanymen naqty mysal keltirmeitinin aitady.
Tramp AQSh-tyń bas prokýrory Ýiliam Barr Obamanyń áreketin tergeýden bas tartqanyna tańǵalatynyn bildirgen.
AQSh-ta koronavirýs indetinen ólgenderdiń kúrt kóbeiýine bailanysty prezident ákimshiligine aitylatyn syn qataiǵan saiyn Tramp ta qarsylastaryn kinálaýdy kúsheite túsken. Tramp indet qaýpi jaily sarapshylar eskertýin "oidan shyǵarylǵan" dep ataǵannan keiingi birneshe aida koronavirýs infektsiiasy saldarynan AQSh-ta 88 myń adam ólgen.
Reuters agenttigi prezident sailaýynda Djo Baidenmen báseke kúsheietin kún jaqyndaǵai bastaǵanda, Tramptyń demokrattardy synaýy údei tústi dep atap ótken.
Bas prokýror Barr eki kandidattyń sailaý aldyndaǵy kúresi saiasi debat aýqymynda ótýi tiis dep eskertti. Bas prokýrordyń sózinshe, kandidattardyń saiasi áreketterine bailanysty kez kelgen tergeý Ýiliam Bardyń kelisimimen ǵana bastalýy múmkin.
