Dúisenbi kúni AQSh-tyń Illinois shtatynda bir motorly shaǵyn ushaqtyń qulaýy saldarynan tórt adam qaza tapty, dep habarlaidy ABC News.
Ushaq jergilikti ýaqyt boiynsha shamamen kúndizgi saǵat 3:45-te, Karlinvill qalasynan ońtústikke qarai 4,8 shaqyrym jerde belgisiz jaǵdaida qulaǵan. Jerde apat saldarynan eshkim zardap shekken joq, dep habarlady jergilikti sherif Shon Kal.
KSDK.com habarlamasy boiynsha, áýe apatynan qaza tapqan ushqysh pen úsh jolaýshy dos bolyp, bir ýniversitette oqyǵan. Jolaýshylardyń biri, Daniel Shedd, ushar aldynda ata-anasyna ushaqtan selfi jasap jibergen.
Onyń ákesi Charlz Shedd ushqysh Djoshýa Svirs ushaqty taiaýda ǵana satyp alǵanyn, biraq áýe kemesi «tamasha jaǵdaida» bolǵanyn, barlyq qajetti tekseristen ótkenin aitty.
Charlz balasy men dostaryn áýejaiǵa ózi shyǵaryp salǵan. Shedd balasynyń osyndai shaǵyn ushaqpen eshqashan ushpaǵanyn, biraq dostarymen birge ushýdy taǵatsyzdana kútip júrgenin aitty.
Ákesi arnaiy qosymsha arqyly ushaqtyń ushýyn baqylaýǵa áreket jasaǵan kezde, odan eshteńe shyqpady, Charlzdiń balasyna jibergen barlyq habarlamalary oǵan jetken joq. Egde jastaǵy er adam oǵan telefon soqqan, alaida jaýap bolmaǵan. Sodan ol jergilikti politsiiaǵa habarlasqan.
Ushaqtyń synyqtary shamamen kúndizgi saǵat 4:30-da Karlinvill qalasyna jaqyn jerdegi jazyq daladan tabyldy. Dárigerler oqiǵa ornynda barlyq tórt dostyń ólimin belgiledi.
