Koronavirýstyń jyldam juǵatyn jańa túri – Omikron AQSh-ta tarap jatqan virýstyń negizgi túrine ainaldy. 20 jeltoqsanda AQSh densaýlyq saqtaý júiesiniń ókilderi osylai dep málimdedi. Birneshe iri qalada maska taǵý jáne ózge de shekteý sharalary qaita engizildi.
AQSh aýrýdy baqylaý jáne aldyn alý ortalyǵynyń málimetinshe, ótken aptada koronavirýs juqtyrǵandardyń 73 paiyzynan Omikron anyqtalǵan. Densaýlyq saqtaý salasynyń mamandary ózge elderde naýqastar kóbeiip jatqan tusta bul tańǵalarlyq jait emes ekenin aitady.
Afrika ǵalymdary Omikron jóninde alǵash ret ótken aida habarlaǵan jáne 26 qarashada Dúniejúzilik densaýlyq saqtaý uiymy (DDSU) ony "alańdatarlyq shtamm" dep ataǵan. Koronavirýs mýtatsiiasy sodan beri shamamen 90 elde anyqtalǵan.
Niderlandy Rojdestvo kezinde lokdaýn jariialady. Al Eýropa komissiiasynyń prezidenti Ýrsýla von der Leien qańtardyń ortasyna qarai Omikron Eýropada taraityn negizgi koronavirýs túrine ainalady dep málimdedi.
Aq úidiń resmi ókili Djen Psakidiń habarlaýynsha, prezident Djo Baiden 21 jeltoqsanda Amerika halqyna málimdeme jasap, "vaktsinanyń paidasyna" toqtalady. Degenmen Psakidiń aitýynsha, Baiden osyǵan deiin elde lokdaýn jariialamaitynyn aitqan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
