AQSh qorǵanys ministri Mark Esper ulttyq gvardiia sarbazdarynyń afroamerikalyq Djordj Floidtyń óliminen keiin bolǵan narazylyq kezindegi áreketin tekserýdi tapsyrdy.
Qorǵanys ministrliginiń resmi habarlamasyndaǵy aqparatqa sáikes, Esper 11 maýsymda "azamattyq tolqý kezinde quqyq qorǵaý organdaryna kómektesken ulttyq gvardiianyń qimyly" zertteledi dep málimdegen. 25 mamyrda afroamerikalyq Djordj Floidtyń politsei qolynan qaza tabýynan keiin bastalǵan násilshildikke qarsy narazylyqty basý kezindegi ulttyq gvardiianyń áreketine bailanysty túrli syn aitylǵan.
Ulttyq gvardiianyń ásirese, 1 maýsymda Aq úi mańyndaǵy Lafaiet alańynan adamdardy tyqsyrǵany ótkir synǵa ushyraǵan. Bul kúni prezident Donald Tramp shirkeýge barý úshin alań aýmaǵynan ótetin bolǵan. Alańdaǵy narazylardy tyqsyrý úshin sarbazdar burysh ballondary, tútin qutylar, rezeńke oq paidalanǵan.
Sol kúni Tramppen birge shirkeýge barǵan shtab bastyqtarynyń birikken komitetiniń tóraǵasy, AQSh armiiasynyń generaly Mark Milli 11 maýsymda prezidentpen birge kóp aldyna shyqqanyna ókinip, keshirim suraǵan. "Men olai istemeýim kerek edi. Top arasynda meniń de bolǵanym áskeriler ishki saiasatqa aralasady degen áser qaldyrdy" dep málimdegen.
