Kókshetaýdaǵy Dańq memorialynda Ekinshi dúniejúzilik soǵysynyń qatysýshylary Kamen Jumanov, Tóleýbai Jumabekov jáne belgisiz jaýyngerge áskeri qurmet kórsetýge arnalǵan «Erlikke taǵzym» estelik aktsiiasy ótti, dep habarlaidy "Ult aqparat". Aqmola oblystyń ishki saiasat basqarmasyna silteme jasap.
Taǵylymdy sharaǵa aimaq Ermek Marjyqpaev, Resei Federatsiiasy Elshiliginiń, «Atamnyń amanaty» qoǵamdyq birlestiginiń ókilderi, sondai-aq qaza tapqan jaýyngerlerdiń týystary qatysty.
Aimaq basshysy óz sózinde izdestirý tobyna alǵys aityp, atalǵan aktsiianyń óskeleń urpaq úshin mańyzdylyǵyn atap ótti.
«Biz qazir Otanymyzdy fashizmnen qorǵaǵan atalarymyz ben ákelerimizdiń jaýyngerlik erlikteriniń mysaldaryn jańa urpaqtyń jadynda saqtaý úshin kóp jumys istep jatyrmyz. 90 myń aqmolalyqtyń 37 myńnan astamy soǵystan oraldy. Biz 500-den astam qazaqstandyq batyrlardyń arasynda Aqan Qurmanov, Aleksandr German, Nikolai Sergienko siiaqty jerlesterimizdiń baryn maqtan tutamyz», - dep atap ótti Marjyqpaev.
Aita keteiik, 4 jyl ishinde Stepnogorsk qalasynyń «Pokolenie» jáne «Kókshe-izdestirý» jasaǵynyń izdeýshileri soǵysqa qatysqan 200-ge jýyq adamnyń máiitin taýyp, jerlengen oryndaryn anyqtady.
1942 jyly 21 aqpanda Qorǵaljyn aýdandyq áskeri komissariaty shaqyrǵan Aqmola oblysynyń týmalary Kamen Jumanov pen Tóleýbai Jumabekovtyń súiekteri aǵymdaǵy jyldyń sáýir aiynda Tver oblysy Rjev qalasynyń aýmaǵynda Máskeý qalasynyń «Pioner» izdestirý jasaǵymen tabyldy. Úshinshi jaýyngerdiń qaldyqtaryn anyqtaý múmkin bolmady.
Mitingten keiin sarbazdardyń súiegi týǵan jeri Qorǵaljyn aýdanyna qaita jerleýge jiberildi.
