«Jer-anany aldai almaisyń, ony saqtai bilý kerek», — dedi Aqmola oblysynyń ákimi Ermek Marjyqpaevtyń Sandyqtaý aýdanynyń aýyl sharýashylyq taýar óndirýshilerimen kezdesýinde ataqty diqan, metsenat, Svobodnoe» JShS bas direktory Aleksandr Zakýsilov.
Astyq pisip turǵan egistik dalasynda oblys ákimi aýyl sharýashylyǵy qurylymdary men sharýa qojalyqtarynyń basshylarymen jer óńdeýdi jaqsartý, egin oraǵy naýqanyn ótkizý, aýyl sharýashylyq tehnikalaryn jańartý, ónimdi boljaý jáne t.b. máselelerdi talqylady. Aýdanda aýyl sharýashylyǵy dándi daqyldarynyń jazǵy egistigi 313 myń ga quraidy. Kúzgi egistik jumystaryn júrgizýge 4600 tonnadan asa arzandatylǵan dizeldik janar mai bólindi. Jyl basynan beri 1 mlrd 990 mln teńgege 39 traktor, 9 astyq jinaý kombainy, 5 egin egý kesheni jáne t.b. tehnikalar satyp alyndy.
Sandyqtaý aýdanynyń Veseloe aýylynda Ermek Marjyqpaev «Týǵan jer» baǵdarlamasy boiynsha «Baidaly» jáne «Baidaly-2» AShK» aýyl sharýashylyq kásiporyndary salǵan birqatar áleýmettik obektilerdi aralady. Osy myqty sharýashylyqtyń negizin qalaýshy Amangeldi Orazalin boldy. Búgingi tańda onyń isin balasy Marat pen aǵasy Baǵdat jalǵastyryp keledi. Agroqurylym dańqty atasy, Sotsialistik Eńbek Eri Baidaly Orazalinniń esimimen atalǵan.
Pedagogikalyq kadrlardy tartý úshin sharýashylyq eki qabatty segiz páterli úidi rekonstrýktsiialaǵan, jas mamandar men kópbalaly otbasylarǵa arnap 4 úidiń qurylysyn salý qarastyrylǵan. Sonymen qatar, kásiporynnyń qarjysy esebinen aýylda qoǵamdyq monsha, naýbaihana, kópbeiindi sport alańy issaparda júrgen jumysshylarǵa arnalǵan qonaq úi, meshit salyndy. Sondai-aq damyǵan infraqurylymy bar 400 bas MIQM men jylqyǵa arnalǵan zamanaýi bordaqylaý alańynyń qurylysyn salý bastaldy. «Sizderdiń otbasylaryńyz — qurmetti diqandar áýleti. Sizder osynda týdyńyzdar, óz aýyldaryńyzdy jaqsy kóresizder, óz eńbekterińizben shaǵyn Otanyńyzdyń atyn shyǵarasyzdar», — dedi Ermek Marjyqpaev Marat pen Baǵdat Orazalinderge týǵan aýylyn damytýǵa qosqan úlesteri úshin alǵysyn bildirip.
Jaqsy aýdanynyń Kievskoe aýylynda «Agrofirma TNK» JShS basshysy Batyrbek Ýáliev oblys ákimin «Trýd» enshiles kásiporny júzege asyrǵan áleýmettik baǵyttaǵy jobalarmen tanystyrdy. Sharýashylyq sýbektisi bastapqy tyń igerýshiler mýzeiin, rekonstrýktsiialady, monsha kesheni, demalys ortalyǵy, balabaqasha qurylystaryn saldy. Óz kezeginde, Ermek Marjyqpaev agrokásiporynnyń basshylaryna aýyl turǵyndaryna jasap otyrǵan qamqorlyqtary úshin alǵysyn bildirdi.
