Aqmolalyq bishiler Tailand astanasy Bangkokte sporttyq biden ótken «World Open Kings CUP 2019» álem chempionatynda júldeger atandy. Bul týraly Aqmola oblystyq dene shynyqtyrý jáne sport basqarmasynyń baspasóz qyzmeti habarlady.
Baspasóz ókilderiniń habarlaýy boiynsha, jarysqa QR Ulttyq quramasynyń atynan Aqmola oblystyq balalar men jasóspirimderdiń mamandandyrylǵan sport mektebiniń «Reverans» sporttyq bi klýbynyń tárbilenýshileri qatysqan. Onyń ishinde Erqoja Ábilqaiyr men Iasmina Aidarova juby eki kúmis júldege qol jetkizgen.
Sonymen qatar, WDSF jastar arasynda Nurbek Sultanov pen Olga Orlova, jasóspirimder arasynda Vladislav Maksin men Daria Nikiforova juby jaqsy nátije kórsetti.
«Reverans» sporttyq bi klýbynyń jetekshisi Elmira Sháripova atap ótkendei, jerlesterimiz eki klass joǵary óner kórsetti.
«Sońǵy jyldary biz atalmysh jarys deńgeiine sai bolý úshin baǵdarlama qostyq. TMD elderinde osy jastaǵylar arasynda bi sandarynyń sanaty joq», - deidi E.Sháripova.
Aita ketsek, Aqmola oblysynyń shyǵarmashylyq ujymdary halyqaralyq arenada jemisti óner kórsetip keledi. Mysaly, biyl «Rýhani jańǵyrý» baǵdarlamasynyń «Zamanaýi Qazaqstan jahandyq álemde» arnaiy jobasyn júzege asyrý aiasynda Aqmola oblystyq «Gákký» filarmoniiasynyń bi ujymy Birikken Arab Ámirlikterinde «Qazaq mádeni murasy aptalyǵynyń» qatysýshysy boldy. «Kókshetaý» mádeniet saraiynyń shyǵarmashylyq ujymdary Resei, Túrkiia jáne Grýziiany óz daryndaryna toǵystyrdy, onda horeografiialyq ónerdiń halyqaralyq festival-konkýrstarynda I, II jáne III dárejeli laýreattar jáne Gran-Pri iegerleri atandy.
