Aqmola oblysynyń Olginka aýylynda túinemege bailanysty jariialanǵan karantin 30 tamyzda alynady. Bul týraly "Ult aqparat" aimaq ákimdiginiń baspasóz qyzmetine silteme jasap habarlaidy.
Aqmola oblysynyń ákimi Ermek Marjyqpaev Arshaly aýdandyq aýrýhanasyna baryp, «túineme» diagnozymen túsken naýqastardyń jaǵdaiymen tanysty. Sondai-aq Olginka aýylyndaǵy indettiń oshaǵyn oqshaýlaý jónindegi shtabtyń kóshpeli otyrysyn ótkizdi.
Kóshpeli otyrysta oblys ákiminiń orynbasary Ǵalymjan Ábdihalyqov, Arshaly aýdanynyń ákimi Talǵat Muhanbetjanov jáne Qoǵamdyq densaýlyq saqtaý departamentiniń basshysy Aigúl Mýsina oshaqty joiý úshin qandai sharýa tyndyrylǵanyn baiandady.
«Búgingi tańda 6 adamnyń 4-eýiniń diagnozy zerthanalyq túrde rastaldy. Olar dárigerlerdiń baqylaýynda jáne qajetti em alyp jatyr. Naýqastardyń jaǵdaiy turaqty. Maldyń indetti juqtyrý sebebi anyqtalýda. Olginka aýylynda karantindik is -sharalar júrgizilýde. Onyń ishinde aýlalar úsh márte dárilendi. Karantin 30 tamyzda tolyǵymen alynyp tastalady», - delingen baspasóz qyzmetiniń málimetinde.
Taýarlar men qyzmetterdiń sapasy men qaýipsizdigin baqylaý komitetiniń oblystyq basqarmasynyń basshysy Záýresh Jumadilova mal soiý kezinde veterinarlyq kýálandyrýdyń bolmaýy indettiń juǵýyna negizgi sebep bolýy múmkin degen pikir aitady.
«Veterinar mamandar jetispeidi. Olar mal soiý oryndaryna jedel jete almai otyr. Veterinar aýrýdy identifikatsiialap, aýrý maldyń eti bólshektelgenge deiin ony oqshaýlai alar edi», – deidi maman.
Qazaq mal dárigerlik ǵylymi-zertteý institýtynyń qyzmetkeri, veterinariia ǵylymdarynyń kandidaty Vladislav Sýshihtyń aitýynsha, eldi mekende karantindik sharalar joǵary deńgeide júrgizilýde. Óz sózinde malǵa egilgen vaktsinanyń sapasyna kúmán keltirdi. Sondai-aq ol el ishinde sanitarlyq-aǵartý jumysty kúsheitý qajettigin atap ótti.
Óńir basshysy Ermek Marjyqpaev salalyq departamentter men basqarmalarǵa indettiń epidemiialyq oshaqtaryn der kezinde anyqtaýdy, esepke alýdy jáne tekserýdi qamtamasyz etý boiynsha jumysty jalǵastyrýdy, halyq arasynda sanitarlyq-aǵartý jumystaryn kúsheitýdi, aýyl sharýashylyǵy janýarlaryn túgeldei ýaqytyly egýdi, kúidirginiń oshaǵyn joiý boiynsha is-sharalar josparynyń oryndalýyn qamtamasyz etýdi tapsyrdy.
«Búgin biz mańyzdy máseleni talqyladyq. Barlyq shtab músheleri jaǵdaidy jeke baqylaýda ustaýy qajet. Epizootiialyq jaǵdai veterinarlyq qaýipsizdiktiń quramdas bóligi bolyp tabylady. Azamattardyń densaýlyǵy men amandyǵy soǵan bailanysty», - dedi oblys ákimi.
Eske salsaq, 18 tamyz kúni Aqmola oblysynyń Arshaly aýdanyna qarasty Olginka aýylynda túinemege qatysty karantin jariialandy. 19 tamyzda zalaldanǵan ettiń 80 paiyzy joiylǵan bolatyn. Sol kúni QR Aýyl sharýashylyǵy ministrligi 15 kúnnen keiin Olginka aýylyndaǵy karantindy alyp tastaityndaryn aitqan. QR Aýyl sharýashylyǵy ministri Saparhan Omarov indet topyraqtan shyqty degen boljam aitqan.
