Aqmola oblysyndaǵy aýrýhanalarǵa birden barlyq patsientke ottegi bere alatyn qondyrǵy ornatylady, dep habarlaidy "Ult aqparat" oblystyq ishki saiasat basqarmasyna silteme jasap.
COVID-19 baspasóz ortalyǵynyń málimetinshe, ottegi beretin eki stansany ornatý úshin jetkizýshilermen kelisimshart jasalǵan. Olardyń biri Q.Qurmanbaev atyndaǵy Aqmola oblystyq ftiziopýlmonologiia ortalyǵyna, al ekinshisi – Arshaly aýdandyq aýrýhanasyna ornatylady. Osyndai arnaiy júie Kópsalaly oblystyq aýrýhananyń provizorlyq statsionarynda da uiymdastyrylady.
Teri-venerologiia dispanserinde ashylǵan Kópsalaly oblystyq aýrýhananyń provizorlyq statsionarynda ottegimen jabdyqtaý júiesin jaqsartý josparlanǵan. Ázirge munda ottegi ballondarynan quralǵan qondyrǵy jumys istep jatyr.
«Endi ylǵal gaz patsientke qubyrlar arqyly barady. Oblys ákiminiń qoldaýymen qondyrǵyny jańartý jáne aýrýhanany ottegimen jabdyqtaýǵa qosymsha qarajat bólingen», - dep baiandady KOA bas dárigeri Nurlan Jarov.
Budan basqa, oblystyq densaýlyq saqtaý basqarmasy aldaǵy ýaqytta 15 ókpeni jasandy jeldetý apparaty, 1 myń pýlsoksimetr, 100 ottegi kontsentratory jáne 50 ottegi ballonyn satyp alady, olardyń barlyǵy óńirdegi aýrýhanalarǵa taratylady.
Aita keteiik, meditsinalyq mekemelerge qaiyrymdylyq qorlar men metsenattardyń qarajatyna satyp alynǵan jabdyqtar áli de jetkizilip jatyr. Búginde aýrýhana, statsionar men emhanalarǵa demeýshilerdiń qarajaty esebinen júzden astam ottegi kontsentratory, 500 ottegi ballony jetkizildi.
