Aqmola oblysynda órt eki adamnyń ómirin qiyp ketti, dep habarlaidy "Ult aqparat".
Vedomstvonyń málimetinshe, aǵymdaǵy jyly aqpannyń 23-de saǵat 03:55 minýt shamasynda Zerendi aýdandyq órt sóndirý bóliminiń pýltine Alekseevka aýylyndaǵy úidiń órtenip jatqany týraly habarlama kelip tústi. Shaqyrý ornyna Zerendi aýdanynyń jáne Kókshetaý qalasynyń órt sóndirý jasaqtary jiberildi. Órtti sóndirý jáne úidiń qurylymyn buzý barysynda eki adamnyń denesi tabyldy.
«Kýágerlerdiń sózinshe, qaza bolǵan otaǵasy órt kezinde eki balamen úide bolǵan. Ol balalardyń birin úiden alyp shyǵyp, ekinshisin qutqarmaqshy bolǵanda úiden shyǵa almai qalǵan. Tilsiz jaýdy aýyzdyqtaýǵa TJD jeke quramynan 20 adam jáne 5 arnaiy órt sóndirý tehnikasy jumyldyryldy. Órt saǵat 05:00 minýtta aýyzdyqtalyp, 06:40-ta tolyq sóndirildi», - dedi vedomstvodan.
TJD baspasóz qyzmetinen atap ótkendei, qazirgi kezde órttiń shyǵý sebebi jáne adamdardyń qaza bolýyna qatysty sotqa deiingi tergeý sharalary júrgizilýde. Sondai-aq, sot meditsinalyq saraptama taǵaiyndalyp, órt - tehnikalyq zerthana zertteý júrgizýde.
