Aqmola oblysynda tarihi-mádeni jádigerlerdi tsifrlandyrý maqsatynda 43 kieli nysanǵa QR-kod ornatylǵan. Atalǵan jumystar «Eskertkishter syr shertedi» jobasy aiasynda júzege asyp otyr.
QR-kodtyń basty artyqshylyǵy – mobildi qosymsha kómegimen shifrlanǵan aqparatty oqi alýynda bolyp otyr. Ony kez kelgen adam qarapaiym smartfonnyń kómegimen onlain-rejimde kóre alady.
Atap aitqanda, Ereimentaý aýdanyndaǵy Bógenbai batyr eskertkishi, Atbasar qalasyndaǵy belgili jazýshy Iliias Esenberlin eskertkishi, Kókshetaý qalasynda Abylaihan eskertkishi, Zerendi aýdanyndaǵy Ýáli han mazary sekildi birneshe nysanǵa QR-kod qoiylǵan. Osylaisha, týrister, qonaqtar jáne qala turǵyndary tsifrlyq tehnologiialar arqyly kóne eskertkishterdiń tarihy týraly tanymdyq aqparattar ala alady. Buǵan qosa, QR-kod arqyly óner salasyna úlken týyndy ákelgen tulǵalardyń (Aqan seri, Birjan sal) tarihy men ekinshi dúniejúzilik soǵys batyrlary (Talǵat Bigeldinov, Málik Ǵabdýllin jáne t.b.) týraly tyń aqparattar oqýǵa bolady.
Búgingi tańda Kókshetaý-Nur-Sultan avtojoly boiynda jańadan ornatylǵan Aqan seri, Birjan sal, Balýan Sholaq, Úkili Ybyrai, Kenesary han eskertkishterine QR-kodtar qoiý jumystary júrgizilip jatyr. Sonymen qatar, XIX-XX ǵasyrdaǵy sáýlet-óner eskertkishi sanalatyn «Kókshetaý qalasynyń tarihy mýzei ǵimaratyna» jáne «Iýnost» kinoteatr ǵimaratyna QR-kod ornatyldy.
Aita ketsek, atalǵan joba «Rýhani jańǵyrý», «Tsifrlyq Qazaqstan» baǵdarlamalarymen bite qainasyp jatyr. Buǵan deiin elimizde tarihi nysandardy jappai tsifrlandyrý jumystary qolǵa alynǵan bolatyn.
Búginde Aqmola oblysynda 4 respýblikalyq eskertkish, 1032 jergilikti eskertkish jáne 757 nysan tirkelgen. «Qasietti Qazaqstan» entsiklopediiasynyń I tomyna Aqmola oblysynan 200-den astam tarihi-mádeni nysan enip otyr.
