Aqbópe Táńirbergen arnaiy baǵdarlamany túsirý úshin Almatyǵa issaparmen ushyp kelgen. Alataý oblysynyń ákimine barar aldynda Medeý jáne Naýryzbai aýdany ákimdiginde bolǵan. Jýrnalist Prezidenttiń jastar kadrlyq rezerviniń múshesi, jas ákim ashyq jáne ońai jaýap beredi dep úmittengenin aitty.
"Biz ákimderge eskertýsiz, tosynnan kelemiz. Bul ákimdikterdiń naqty jumysyn kórsetý úshin jasalyp jatyr. Biraq masqaralaý nemese arandatý nietim bolǵan joq. Aldymen men kúndiz Alataý aýdany ákimdigine keldim. Ákimniń kómekshileri shyqty, men olardan suhbat alýdy suradym. Jaýap retinde olar aldymen ákim daiyndalý kerek ekenin aityp, suraqtarymdy, ótinim berýdi surady. Men olarǵa olai bolmaitynyn aitym, keiin olar kelisip, sol kúni saǵat 17.30-da ákimmen suhbat júrgizýge kelistik", - dedi ol.
Tilshi qyz belgilengen ýaqytta ákimdikke barǵan. Biraq sheneýnikter kelisimdi umytyp, jýrnalistke turǵyndardy qabyldaý bólimine barýǵa keńes bergen, al kúzetshige buqaralyq aqparat quralyn kirgizbeýdi tapsyrǵan. Bir saǵat kútken jýrnalist eshqandai jaýap ala almaǵandyqtan ákimdikke ózi kirýge tyrysqan. Biraq mundai jaǵdai bolady dep kútpegen. Ol kúzetshige tek "keshirińiz, ákimge qoiatyn suraqtarym bar" degenin aitty.
Alataý oblysynyń ákimdigi aqparattyq portaldarǵa jazbasha túsinikteme berdi. Degenmen, Aqbópe Táńirbergenniń aitýynsha, eshkim odan keshirim suramaǵan jáne keiin de suhbat úshin shaqyrmaǵan.
"Olar meni qýyp jiberdi, biraq men sol jerde biraz otyrdym. Memlekettik qyzmetkerler qazir jaǵdaiymdy surap, sý ákeler dep úmittendim. Ókinishke qarai, olai bolmaidy. Men kúzetshige qarsy aryz jazdym. Politsiiaǵa videony kórsettim. Olar áli de keshirim surap, habarlasqan joq. Alataý oblysy ákimdigi jaýabynda olar meni Ashyq arqyly ótpedi degen, biraq olar bastapqyda bul týraly suraǵan joq, óitkeni meni kirgizý oiy bolǵan joq. Meniń statýsym "jasyl", men buryn vaktsina alǵanmyn. Olar mundai syltaýdy qaidan tapqanyn bilmeimin", - dep qosty Aqbópe Táńirbergen.
Sondai-aq, "Habar 24" bas direktory Alena Gorbacheva telearna atynan aryz jazylatynyn málimdep, fb-da jazba jariialady.
Aita keteiik, "Habar 24" jýrnalisi Almatyda ákimdik ǵimaratynan kúshtep shyǵarylǵany habarlanǵan bolatyn. Oqiǵanyń videosyn tilshi Facebook-paraqshasynda jariialady. Keiin ákimdik túsinik berdi.
