Sońǵy eki jylda «jetim balalar jáne ata-anasynyń qamqorlyǵynsyz qalǵan balalar» sanatyna jatatyn 3189 qazaqstandyq Otbasy banktiń qoldaýymen baspanaly boldy, dep habarlaidy ult.kz.
2025 jyly 582 adam turǵyn úimen qamtylsa, 2026 jyly bul kórsetkish bes esege jýyq ósken. Onyń ishinde 2274 adam jaldamaly baspana alǵan, 740 azamat jyldyq 2 paiyzdyq mólsherlememen jeńildetilgen ipoteka rásimdegen. Al 175 adamǵa jaldaý aqysynyń 50 paiyzyn sýbsidiialaý túrinde kómek kórsetildi.
Otbasy banktiń málimetinshe, Ónerkásip jáne qurylys ministrligimen birlesip, «Turǵyn úi qatynastary týraly» zańǵa ózgerister engizildi. 2026 jylǵy 14 qyrkúiekten bastap bala asyrap alý nemese qamqorshylyq toqtatylǵan jaǵdaida azamattyń turǵyn úi kezegine turǵan bastapqy kúni saqtalady.
Sonymen qatar bólinetin turǵyn úidiń keminde 20 paiyzy jetim balalar men ata-anasynyń qamqorlyǵynsyz qalǵan balalarǵa beriledi. Máselen, ákimdik 100 páter bólse, onyń 20-sy osy sanatqa tiesili bolady.
Jetim balalardy turǵyn úi kezegine týǵan sátinen bastap qoiýǵa múmkindik beriledi. 18 jasqa deiin ata-anasynan aiyrylǵandardyń bul quqyǵy 29 jasqa deiin saqtalady. Áskerge shaqyrylǵan azamattar úshin merzim qyzmet ótkerý ýaqytyna uzartylady.
Qazir turǵyn úi bólý protsesi avtomattandyrylǵan. Júie azamattyń kezekke turǵan kúnin, áleýmettik sanatyn jáne tabysyn eskeredi. Otbasy bank derekterdi tekserý úshin 15 memlekettik aqparattyq bazamen integratsiialanǵan.
Tabysy tómen azamattarǵa jaldaý aqysyn sýbsidiialaý nemese jaldamaly turǵyn úi usynylsa, ipotekalyq qaryzdy óteýge múmkindigi bar azamattarǵa jeńildetilgen nesie beriledi. Tabys týraly málimetter de tsifrlyq júie arqyly avtomatty túrde tekseriledi.
Osylaisha, jańa júie turǵyn úidi bólýde azamattyń áleýmettik mártebesimen qatar, qarjylyq jaǵdaiyn da eskerýge múmkindik beredi.
