Almaty oblysynda 71 aýyldyq okrýg ákimin sailaý naýqany qarqyndy júrip jatyr, dep habarlaidy "Ult aqparat".
Búgingi tańda úmitkerlerdiń usynymyn qabyldaý aiaqtaldy. Aldaǵy kezekte úgit-nasihat jumystary men ákimderdi sailaý isi tur.
279 tulǵa usynym jiberip úlgergen. Onyń ishinde 93-i - saiasi partiia ókilderi bolsa, 186 azamat aýyldyq okrýgti basqarýǵa qaýqarlymyn dep ózin-ózi usynǵan.
Aita ketý kerek, Aqsý, Alakól, Kegen, Kerbulaq, Panfilov aýdandaryna qarasty aýyldyq okrýgterine ákim bolyp sailanamyn deýshiler ózin-ózi usynǵan.
Kandidattar arasynan 243-i talapqa sai kelse, 16 tulǵa saiasi básekeden shet qaldy.
Aýyldyq okrýgti basqarýǵa baǵyn synap jatqandardyń ishindegi eń jasy Jantas Amangeldiuly. Jasy 25-te. Alakól aýdanynyń Terekti aýyldyq okrýgin basqarmaqqa óz kandidatýrasyn usynǵandardyń biri.
Eńbekshiqazaq aýdanyna qarasty, Baltabai aýyldyq okrýginiń tizgigin ustamaqqa usynym bergen Juman Myqtybaev - úmitkerlerdiń ishindegi eń úlkeni. Onyń jasy 62-de.
«154 úmitker jumys istep júrgen memlekettik qyzmetshiler bolyp tabylady. Onyń ishinde 35 úmitker qaita sailaný arqyly daýysqa salynady. Ortasha báseke – 3,9 adam. Barlyq okrýgte úmitkerlerdiń sany 3-ten kóp. Eń kóp úmitker tirkelgen aimaq - Ile aýdany Chapaev aýyldyq okrýgi. Mundaǵy kandidattardyń sany - 9», - deidi Almaty oblystyq sailaý komissiiasynyń múshesi Qaharman Jaqsylyq.
