Almaty qalasynda QR Ortalyq memlekettik mýzeiinde «Aqiqat» ulttyq qoǵamdyq-saiasi jýrnalynyń 100 jyldyǵyna arnalǵan «Kemel oidyń kerýeni» atty kórme ashyldy, dep habarlaidy QazAqparat.
«Aqiqat» ulttyq qoǵamdyq-saiasi jýrnaly alǵash 1921 jyldyń 15 qyrkúieginde Orynborda «Qyzyl Qazaqstan» degen atpen jaryq kórgen. Sol kezeńniń ótkir máselelerin kótergen basylymda Nyǵmet Nurmaqov, Smaǵul Sádýaqasov, Oraz Jandosov, Janaidar Sádýaqasov siiaqty saiasi tulǵalar qyzmet etken.
M.Áýezovtiń «Qorǵansyzdyń kúni», B.Mailinniń «Shuǵanyń belgisi», T.Rysqulovtyń tarihi maqalalary alǵash osy jýrnalda shyqty.
Basylym ataýy birneshe ret ózgerip, «Qazaqstan bolshevigi», «Qazaqstan kommýnisi» dep ataldy.
1991 jyldyń qyrkúieginen bastap jýrnal «Aqiqat» ataýymen shyǵyp keledi. «Jýrnaldyń rebrendingi 1991 jyly Qazaqstan Táýelsizdigin alǵan kezeńmen tuspa-tus kelýi jaqsylyqtyń nyshany bilemiz», — dep atap ótti basylym qyzmetkerleri.
«Aqiqat» jýrnaly 2002 jyly Qazaqstan Jýrnalister Akademiiasynyń «Altyn juldyz», 2008 jyly Jýrnalister odaǵynyń syilyqtaryna ie boldy. 2021 jyly QR Prezidenti Qasym-Jomart Toqaevtyń alǵys hatymen marapattaldy.
Kórmege jýrnaldyń alǵashqy sandary, arhivtegi qundy derekter, tarihi jariialanymdardyń kóshirmeleri qoiylady.
Kórme 2021 jyldyń 22 qyrkúieginen 6 qazanǵa deiin jumys isteidi.
