Air Astana áýe kompaniiasy Qazaqstanda aviaotyn óndirisiniń tómendeýine alańdaýshylyq bildirdi, dep habarlaidy QazAqparat áýe kompaniiasyna silteme jasap.
«Air Astana Qazaqstanda aviaotyn óndirisi kóleminiń aitarlyqtai tómendeýine alańdaýshylyq bildirip otyr. Onyń saldarynan áýe kompaniiasy balansyndaǵy otyn qory edáýir azaidy. Bir apta buryn QR Energetika ministrligi dizel otynyn óndirýdi arttyrý úshin biylǵy qazan aiynda Shymkent munai óńdeý zaýytynda aviaotyn óndirisi eki ese qysqaratynyn málimdedi. Odan bólek, qazan aiynda Pavlodar munai óńdeý zaýytynda josparly jóndeý júmysy júredi, Atyraý zaýytynan aviaotyn jóneltý toqtatylǵan, al otynnyń osy túriniń importy tolyǵymen toqtap tur», - delingen aqparattyq habarlamada.
Air Astana aqparatyna sáikes, «QazMunaiGaz» ulttyq kompaniiasy ishki naryqty jalpy kólemi 35 000 tonna aviakerosinmen qamtamasyz etý týraly málimdegen.
Alaida, bir ǵana Air Astana áýe kompaniiasynyń qoldanystaǵy reisterin úzdiksiz oryndaý úshin ai saiyn 30 000 tonna aviaotyn qajet.
Sonymen birge Qazaqstannan ushatyn halyqaralyq reister birtindep qaita ashylyp jatyr jáne aviakompaniianyń reis sany da ósip keledi.
«Air Astana Úkimetke qazaqstandyq munai óńdeý zaýyttaryna jóndeý jumystarynyń merzimin aýystyrý jáne aviakerosin óndirisiniń burynǵy kólemin kem degende import jetkizilimi qaita bastalǵansha qaitarý usynysymen júgindi. Bul sharalar qysqamerzimdi perspektivada aviatasymaldardy turaqty júzege asyrý úshin óte mańyzdy», - deidi Air Astana.
