Búgin Almaty oblysynda Premer-ministrdiń orynbasary – Mádeniet jáne aqparat ministri, Konstitýtsiialyq reformalar jónindegi komissiia tóraǵasynyń orynbasary Aida Balaevanyń jetekshiligimen «Ádiletti jáne Progressivti Qazaqstannyń Halyqtyq Konstitýtsiiasy úshin!» jalpyulttyq koalitsiiasy músheleri «Shin-Lain» JShS ujymymen kezdesti. Is-sharaǵa Májilis depýtattary Maqsat Tolyqbai, Janarbek Áshimjanov jáne Sergei Ponomarev, «Qazaqstandyq qoǵamdyq damý institýty» KEAQ basqarma tóraǵasy Juldyzai Ysqaqova, «Qazaqstan halqyna» qoǵamdyq qorynyń tóraǵasy Lázzat Shyńǵysbaeva jáne basqalary qatysty.
Kezdesýde Aida Balaeva qoldanystaǵy Konstitýtsiianyń sońǵy 30 jylda Qazaqstannyń qalyptasýy men serpindi damýyna berik negiz bolǵanyn atap ótti. Onyń aitýynsha, qazirgi kezeńde memlekettiń qundylyqtary men basymdyqtaryn naqty aiqyndaýdyń mańyzy erekshe. Vitse-premer jańa Konstitýtsiia Preambýlasynda negizgi qundylyqtar bekitilgenin, sonyń ishinde bilim, ǵylym, mádeniet jáne innovatsiialar alǵash ret konstitýtsiialyq deńgeide aiqyndalǵanyn jetkizdi.
«Memleket bilim sapasyn arttyrýǵa, ǵylymdy damytýǵa jáne ony óndirispen ushtastyrýǵa airyqsha kóńil bólip keledi. Ǵylymi progress nátijesinde búgin sizder bólek jaǵdaida eńbek etip jatyrsyzdar. Óndiris jańartylyp, ónim sapasy jetildirilýde – munyń bári ǵylym damýynyń jemisi. Al sapaly serpilis jasaý úshin bul qaǵidattardy Konstitýtsiia deńgeiinde bekitý qajet. Sebebi Ata zań – keiingi zańnamalyq ári biýdjettik sheshimderdiń negizi», – dedi Aida Balaeva.
Kezdesý barysynda Konstitýtsiiada mádeniet pen tarihi-mádeni murany qorǵaýǵa qatysty normalardyń alǵash ret naqty bekitilgeni de aityldy.
Jańa Konstitýtsiia jobasyn ázirlegen komissiia jumysy týraly Májilis depýtaty Sergei Ponomarev baiandady. Onyń sózinshe, qujatty daiyndaýǵa jetekshi konstitýtsionalister, zańgerler, Konstitýtsiialyq keńes músheleri men parlamenttik fraktsiia jetekshileri qatysqan. Depýtat Preambýlanyń mańyzyna erekshe toqtalyp, ony Konstitýtsiianyń negizgi qaǵidattary men qundylyqtarynyń kórinisi retinde baǵalady.
«Preambýla – jai kirispe emes, bul Konstitýtsiianyń mánin túiindeitin ózek. Jańa Konstitýtsiia shynymen de adamdarǵa jaqyndai túspek. Bar bolǵany on jeti joldan turatyn osy mátinde bizdiń ómirimiz, syrtqy álemge kózqarasymyz, qoǵam ishindegi ózara qarym-qatynas printsipteri jáne memlekettiń uzaq merzimdi damý baǵyty kórinis tapqan», – dep túiindedi Sergei Ponomarev.
Ujym aldynda Juldyzai Ysqaqova da sóz sóilep, jańa Konstitýtsiia jobasy júieli ári tereń taldaý negizinde ázirlengenin atap ótti. Onyń aitýynsha, qujat zamanaýi qaterlerdi eskere otyryp, Ata zań arhitektýrasyn jańǵyrtýǵa jáne qundylyqtyqtardy nyǵaitýǵa baǵyttalǵan. Atap aitqanda, ǵylym, innovatsiialar, bilim jáne mádeniet salasy basymdyq retinde belgilengen.
Kezdesý sońynda «Shin-Lain» JShS qyzmetkerleri suraqtar qoiyp, túsindirý jumystaryna qatysty usynystaryn bildirdi. Jalpyulttyq koalitsiia ókilderi azamattardyń referendýmǵa qatysýynyń mańyzyn atap ótti.
