Memlekettik organdardyń internet-resýrstarynyń biryńǵai tuǵyrnamasyna áli de birqatar memlekettik jáne jergilikti atqarýshy organ kóshken joq. Bul týraly QR Tsifrlyq damý jáne aeroǵarysh ónerkásibi vitse-ministri Abylaihan Ospanov aitty, dep habarlaidy QazAqparat.
«Memlekettik organdardyń internet-resýrstarynyń biryńǵai tuǵyrnamasy Qazaqstan Respýblikasynyń memlekettik aqparat saiasatyn iske asyrý máseleleri jónindegi komissiianyń 7 maýsymdaǵy №3 hattamasyna sáikes iske asyrylyp jatyr. Búgingi kúni osy internet-resýrstardyń biryńǵai tuǵyrnamasyna 76 memlekettik organ men 17 jergilikti atqarýshy organdy kóshirýdi josparladyq. Biraq, búgingi kúni olardyń ishinen 69 memlekettik organ men 12 jergilikti atqarýshy organ kóshirildi. Osy sharany ary qarai jalǵastyrý kerek. Sol sebepten bizdiń tarapymyzdan usynys - osy qalǵan 7 memlekettik organ jáne 5 jergilikti atqarýshy organ jedel túrde internet-resýrstarynyń biryńǵai tuǵyrnamasyna kóshirilse», - dedi vitse-ministr Aqparatqa qol jetkizý máseleleri jónindegi komissiianyń otyrysynda.
Onyń atap ótýinshe, jergilikti atqarýshy organdardan Nur-Sultan, Almaty jáne Atyraý, Aqtóbe, jáne Jambyl oblystary internet-resýrstardyń biryńǵai tuǵyrnamasyna kóshýleri qajet.
«Biz oqytý kýrstaryn ótkizdik. Búgingi kúnge deiin 623 memlekettik qyzmetshiler oqytyldy. 863 memlekettik qyzmettiń pasporttary toltyryldy. Tiisti jumys atqarylyp jatyr. Osy jyldyń sońyna deiin josparlanǵan jumystardy oryndaimyz dep úmittenemin», - dedi Abylaihan Ospanov.
Osy rette otyrysqa tóraǵalyq etken QR Aqparat jáne qoǵamdyq damý ministri Aida Balaeva joǵaryda atalǵan óńirlerdiń ákimdikterine internet-resýrstardyń biryńǵai tuǵyrnamasyna kóshýlerin jedeldetý qajettigin eskertti. Sonymen qatar ministr biryńǵai tuǵyrnamada aqparat júieli túrde jańaryp otyrýy qajettigin basa aitty.
«Keide ailap aqparat jańartylmaidy. Bizge der ýaqytynda berilmegen, eskirip ketken aqparattyń qajeti qansha? Bul da úlken másele. Sebebi aqparat barlyq ýaqytta da ózekti bolýy tiis. Biz qate aqparat tarady dep, adamdar ósek-aiańǵa senedi dep renjimiz. Túptep kelgende mundai jaittyń oryn alýyna resýrstardaǵy aqparattardy júieli túrde jańartpai ózimiz túrtki bolyp otyrmyz. Sondyqtan memlekettik organdar resýrstardaǵy aqparattardy júieli túrde jańartyp otyrý máselesin erekshe baqylaýǵa alý tiis»,- dedi Aida Balaeva.
Aita keteiik, onlain formatta ótken Aqparatqa qol jetkizý máseleleri jónindegi komissiianyń otyrysynda múmkindigi shekteýli adamdardyń aqparatqa qol jetkizý máseleleri, memlekettik organdardyń ashyqtyq deńgeiin jyl saiynǵy baǵalaýdyń negizgi qorytyndylary, memlekettik organdardyń internet-resýrstarynyń biryńǵai tuǵyrnamasynyń jumysy, sondai-aq «Ashyq biýdjetter» portalyn jetildirý boiynsha jumys josparynyń oryndalýy talqylandy.
