Quryltai Tóraǵasy Aibek Dádebai Biýro otyrysyn ótkizip, Memleket basshysynyń tapsyrmalaryn oryndaý, zań shyǵarý qyzmetiniń negizgi baǵyttary jáne Quryltai reglamentin ázirleý máselelerin talqylady, dep habarlaidy ult.kz.
Otyrysta qoldanystaǵy zańnamany túgendep, ony jańa Konstitýtsiiaǵa sáikestendirý basty mindetterdiń biri retinde belgilendi. Bul baǵyt Prezident Qasym-Jomart Toqaev aiqyndaǵan basymdyqtarmen qatar beiindi komitetterdiń jumys josparyna engizilmek.
Aibek Dádebai depýtattardyń aldynda birqatar mańyzdy baǵyt boiynsha jumys turǵanyn atap ótti. Olardyń qatarynda:
- jasandy intellekt pen tsifrlyq aktivterdi damytý;
- kóshi-qon saiasatyn jetildirý;
- erekshe qajettilikteri bar balalardy qoldaý;
- energetikalyq turaqtylyq pen balamaly energetikany damytý;
- onlain-platformalar men BAQ qyzmetin retteý máseleleri bar.
Sonymen qatar Quryltai kún tártibine kitaphana isi men kitap basyp shyǵarý salasyn damytý, jańa memlekettik nagradalardy zańnamalyq turǵydan bekitý máseleleri engiziledi. Atap aitqanda, «Shámshi Qaldaiaqov» medali men «Qazaqstannyń eńbek sińirgen sýretshisi» qurmetti ataǵyn engizý qarastyrylady.
Aldaǵy úsh jylǵa arnalǵan respýblikalyq biýdjetti qaraý da Quryltai jumysynyń negizgi baǵyttarynyń biri bolmaq.
Budan bólek, parlamenttik baqylaýdyń tiimdiligin arttyrý, depýtattardyń halyqpen turaqty bailanysyn qamtamasyz etý jáne «E-Parliament» júiesin jedel engizý máselelerine nazar aýdaryldy.
Biýro otyrysynda Quryltai reglamentiniń jobasyn ázirleýge qatysty tapsyrmalar da berildi. Komitetter men fraktsiialar óz usynystaryn jaqyn arada engizýi tiis. Qujatty Biýronyń kelesi otyrysynda qaraý josparlanyp otyr.
Sondai-aq Quryltai Tóraǵasynyń orynbasarlaryna turaqty komitetterge jetekshilik etý mindeti bekitildi.
