Májilistiń jalpy otyrysynda «Nur Otan» partiiasy fraktsiianyń múshesi, depýtat Maqpal Tájmaǵambetova 1-5 synyptarǵa arnalǵan aǵylshyn tili oqýlyǵyndaǵy birqatar máseleni kóterdi, dep habarlaidy "Ult aqparat".
«Aǵylshyn tilin oqytýǵa arnalǵan oqýlyqtarǵa QR Bilim jáne ǵylym ministrligi tarapynan oń saraptama berilgen. Bul oqýlyqtar «Ekspress Pablishin» baspasynan basylyp shyqqan. Syrtqy muqabasynda aýdarylǵan dep jazylǵanmen, aýdarma emes. 2016 jyldan beri osy baspanyń Qazaqstandaǵy resmi ókili «EDU Stream» kompaniiasy shyǵaryp otyrǵan. Ózgesheligi - Qazaqstan balalarynyń sýretterin paidalanyp taqyrypty ashýǵa tyrysqan. Sana-sezimi jańa qalyptasyp kele jatqan búldirshinge arnalǵan kez kelgen oqýlyq ulttyq ideologiia turǵysynan jasaqtalýy kerek. Al bul kitaptardan qazaqtyń ulttyq uǵymyna, dástúrli tárbiesine kelmeitin, sheteldiń ideologiiasyn nasihattaityn illiýstratsiialar men mátinderdi kóptep kezdestirýge bolady», - dedi Maqpal Tájmaǵambetova Úkimet basshysynyń orynbasary Eraly Toǵjanovtyń atyna joldaǵan saýalynda.
«Ekinshi synypqa arnalǵan oqýlyqta ulttyq dástúrdiń qataryna pasha men maslennitsany engizipti. Muny árine, qazaqstandyq merekeler dep kórsetse túsinýge bolady. Qazaqtyń salt-dástúrleri men ádet-ǵuryptary dep jazylǵan taqyrypta shildehana men balany qyrqynan shyǵarý siiaqty salt-dástúrdiń janynda dini merekeler nege júr?», - dedi depýtat.
Osy oraida oqý baǵdarlamasynda qatelikter jibergen oqýlyqtarǵa qatysty tiisti usynystar aityldy:
Birinshiden, Bilim jáne ǵylym ministrligi bilim baǵdarlamasyna engizgen atalmysh aǵylshyn tili oqýlyqtaryn qaita saraptap, jiberilgen óreskel qatelikterge jaýapkershilikti kúsheitý suraldy.
Ekinshiden, oqýlyq ázirleýde oǵan saraptama júrgizý qaǵidattaryn jiti qarap, normativtik-quqyqtyq aktilerdiń talaptaryn bilim jáne tárbie komponentteriniń tutastyǵy aiasynda kúsheitý qajet.
Úshinshiden, oqýlyq qurastyrýda basshylyqqa alatyn Úlgilik oqý baǵdarlamasyna saraptama jasalyp, baǵdarlama ázirleýshi toptyń quramyn qaita qaraý kerek. Saraptamalyq komissiia quramyna tek aǵylshyn tili muǵalimderi emes, balalar psihologynan bastap, sýretshi pedagog, etnograf, qazaq tili mamandary, ádebietshiler taǵy da basqa mamandardy engizý kerek.
Tórtinshiden, oqýlyqty basyp shyǵarýda sheteldik emes, óz otandyq baspalarymyzdy qarastyrý qajet. Ulttyń jańa bolmysyn qalyptastyrý kezeńinde mundai oqýlyqtar Qazaqstannyń bolashaǵyna jaýap beretin, óz Otanyn qadirleitin urpaqty tárbieleý úshin óte mańyzdy.
