Elorda ákimi Altai Kólginov Ekologiia, geologiia jáne tabiǵi resýrstar vitse-ministri Erlan Nysanbaevpen birge saiabaqtar, býlvarlar men botanikalyq baqta bolyp, olardyń jai-kúiimen tanysty, dep habarlaidy "Ult aqparat".
«Máselen, ótken jyly ǵana ashylǵan «Jetisý» saiabaǵynda aǵashtar qýrap qalǵan, qýraǵan shópter jinalmaǵan, gazondar abattandyrylmaǵan. Sondai-aq aǵashtardyń solǵan butaqtary kesilmegen. Sýarý júiesi aýmaqta jumys istemeidi. Keibir aǵashtar sýdyń jetispeýine bailanysty óte nashar kúide.
Al «Nurly jol» jelekjolynda keibir gúlzarlarda gúlder múldem joq, aǵashtar keýip jatyr», - dep jazdy qala basshysy Instagram-da.
Kólginovtyń aitýynsha, «Ǵashyqtar» saiabaǵy da dál osyndai jaǵdaida. Onymen qosa, synǵan plitalar fontan kelbetin buzyp tur.
Botanikalyq baqta gúlder otyrǵyzylyp, kógaldar tóselgen. Sýarý júiesi de qalpyna keltirilip, sýburqaqtardyń jumysy iske qosylǵan. Munda da aǵashtar men butalardyń jai-kúiin qalpyna keltirý qajet etedi. Ákimshilik ǵimarattarynyń alańynda sýarýdyń durys emestiginen jáne arzan shymtezek tańdaý saldarynan gúlder solǵan. Ósimdiktermen birge aramshópter ósip tur.
Qala ákimi atap ótkendei, «Astana-Zelenstroi» AQ jumysyn qalpyna keltirý, ósimdikterdi emdeý jáne turaqty negizde aǵashtardy, gúlder men butalardy sýarýmen ainalysý qajet.
