- Braziliianyń Rio-de-Janeiro qalasynda ótip jatqan Olimpiada oiyndarynda Ádilbek Niiazymbetov kúmis júldeger atanǵan bolatyn.
Sol jekpe-jekten keiin ony jeńisimen quttyqtadyq. Ol QazAqparat tilshisine suhbat berip turyp, tóreshilerdiń ózine jasaǵan qiianatyn júregi qan jylap turyp jetkizdi. Sodan da bolar, birden suraǵymyzdy kóńilin jubatýdan bastadyq.
- Ádilbek, kúmis te jaman emes qoi. Osy júldege jete almai ketken qanshama sportshy bar. Kúmiske razy emessiń be?
- Joq! Men bul Olimpiadaǵa tek altyn úshin kelgen bolatynmyn. Ol maqsatyma jete almadym. Maǵan kúmis tańsyq emes. Londonda alǵanmyn kúmisti. Rioǵa altyn úshin kelip edim. Men finalda Kýba boksshysyn jeńdim ǵoi. Tóreshiler meniń altynymdy alyp qoidy. Bul qiianatqa qalai shydaýǵa bolady, aityńyzdarshy...
- Ózińe qanshalyqty senimdi bolǵanyńdy sezip turmyz. Biraq, tóreshiler solai sheshim jasady.Bizdiń de qoldan keler qaiyr joq...
- Iá, sizderdi túsinemin. Barynsha qoldaý kórsettińizder. Sizder ǵana emes, búkil Rio halqy meni qoldaǵandai sezindim. Sebebi, men judyryqtasyp júrip zaldan tek, «Qazaqstan jáne Ádilbek» degen daýystardy estidim. Osy daýystardy estigen saiyn ózimdi qairap, alǵa umtyldym. Sol úshin barymdy saldym. Sizderdi uialtqym kelmedi. Ókinishke qarai, tóreshi qarsylasymnyń qolyn kóterdi. tań qaldym.
- Bul jaǵdai osyǵan deiin Levittiń jekpe-jeginde de boldy. Óziń kórdiń. Sen kúmánsiz utý úshin qarsylasyńdy qulatýyń kerek pe edi?
- Iá, qulatýym kerek edi. Biraq, ol da myqty boksshy. Qulaityn boksshy emes. Al men ony qulata almasam da, utqanyma senimdi boldym. Ol maǵan eshteńe istei alǵan joq. Ózderińiz kórdińizder, qashyp júrip aldy.
- Sen 16 jyldan keiin Bolat Jumadilov aǵańnyń erligin qaitaladyń. Biletin de bolarsyń?
- Árine! Biraq, qazir «ustazdan shákirt ozǵan» zamanda bul kórsetkish men úshin tómen nátije. Ol aǵam naǵyz altyn edi. Ol kezde qazirgidei barlyq jaǵdai jasalmaǵan. Meni ol kisimen esh salystyrýǵa kelmeidi. Jumadilov aǵamyz naǵyz altyn azamat.
- Sen ózge elde týyp, qazaq eline Olimpiadanyń eki birdei kúmis júldesin syiladyń. Bul da úlken qýanysh emes pe?
- Men Qaraqalpaqstannan erte keldim. Negizgi balalyq shaǵym osynda ótti. Sport mektebin de osynda bastadym. Men ózge elde týsam da qanym qazaq, janym qazaq. Meni qazaq eli eseitti, ósirdi, jetildirdi. Men eki kúmis emes, eki altyn syilasam da azdyq etedi.
- Osy jekpe-jek óterden buryn qandai kóńil-kúide boldyń?
- Kóńil-kúiim tamasha boldy. Daiyndyǵymdy da óte jaqsy edi. Bapkerlerim ne kerek, bárin oidaǵydai úiretti. Aldyn ala qarsylasymdy da qatty zerttedik. Osal jaqtaryn kórip, solai jumys istedim. Meniń esebim boiynsha jeńis meniki bolatyn.
- Bul jeńisińdi kimge arnaisyń endi?
- Kúmis bolsa da, elime arnaimyn. Biyl Táýelsizdigimizdiń 25 jyldyǵy. Altyn alsam, osy aitýly merekege arnaimyn dep josparlaǵan edim. Biraq, ol biikti baǵyndyra almadym. Barlyq jankúierlerimnen, halqymnan keshirim suraimyn.
- Endi kelesi Olimpiada oiyndaryna qatysasyń ba?
- Ol týraly aita almaimyn. Elge baryp, es jiyp alaiyq. Sosyn, aldaǵy josparymdy mindetti túrde sizdermen bólisetin bolamyn.
- Áńgimeńe rahmet!
Kúnsultan Otarbai
