Dúniejúzilik densaýlyq saqtaý uiymynyń málimetinshe, álemde koronavirýs infektsiiasyn juqtyrǵandar sany 12 millionnan asqan. 548 myńnan astam adam qaitys boldy. Juqtyrý men ólim-jitim statistikasy kún sanap artyp, adamzat áli indetti eńsere almai tur, dep habarlaidy "Ult aqparat".
DSU infektsiianyń taralýy órship jatqanyn jariialady. Ótken demalys kúnderi álemde 400 myń adam aýrý juqtyrǵan. Alaida álemde aýrýǵa shaldyǵý deńgeii ósip bara jatqanyna qaramastan, DSU basshysy Tedros Gebreiesýs ázirge álemniń pandemiia shyńyna jetpegenin jariia etti.
Aýrýdyń negizgi oshaǵy myna memleketter:
- Úndistan. Kún saiyn indetke shaldyqqandar sany 20 myńnan asyp otyr. Tek sońǵy táýlikte 24 248 adam aýyrǵan. Bul el aýrýdan qaitys bolǵandardyń jalpy sany boiynsha álemde 8-shi orynda;
- Braziliia. Osy aptada eldiń densaýlyq saqtaý ministrligi bir táýlik ishinde koronavirýs juqtyrǵandar sany 38 myńǵa jýyqtaǵanyn habarlady. Qaitys bolǵandar sany myńnan asady. El Prezidenti Jair Bolsonarý da koronavirýsqa shaldyqqanyn rastady;
- Izrail. Koronavirýs jaǵdaiynyń nasharlaýyna bailanysty bilik shekteýlerdi qaita ornatty. Premer-ministr Biniamin Netaniahý málimdegendei, eger aptanyń basynda elde COVID-19 juqtyrǵandar sany shamamen bir jarym myń adam bolsa, sońǵy kúnderi bul kórsetkish eki ese ósken. Barlar, klýbtar, sport zaldary jabyldy, buqaralyq is-sharalar ótkizýge tyiym salyndy;
- Ońtústik Koreia. Maýsym aiynyń sońynda Ońtústik Koreia biligi koronavirýs infektsiiasyn juqtyrýdyń ekinshi tolqyny bastalǵanyn málimdedi. Tedjon qalasynda áleýmettik qashyqtyqtyń qatań sharalary engizilip, sport zaldar, mýzeiler men kitaphanalar jabyldy;
- Resei. KVI jaǵdaiy qazirgi Resei prezidenti Vladimir Pýtinniń reitingine yqpal etti. «Levada-ortalyqtyń» málimeti boiynsha, sáýir aiynda onyń reitingi 59%-dy, mamyr aiynda - 25%-dy qurady. Bul el basqarǵan 20 jyl ishindegi rekordtyq eń tómengi kórsetkish. Sarapshylardyń aitýynsha, koronavirýs jaǵdaiy mańyzdy ról atqarǵan. Halyq resmi statistikaǵa, emdeý hattamalaryna senbeidi;
- Eýropa. Jaǵdaidyń qalpyna kelip jatqanyna qaramastan, jekelegen elderde aýrýdyń órshýi baiqalady. Mysaly, Ispaniia men Serbiiada. Serbiia biligi Belgradta 10-13 shilde aralyǵynda komendanttyq saǵat rejimin engizetinin jariialady. Qalada COVID-19 aýrýynyń 299 jańa jaǵdaiy anyqtaldy, 13 adam qaitys boldy. Tótenshe jaǵdai Serbiianyń 19 qalasy men aýdandarynda da jariialandy;
Bul rette jańa shekteýler engizý jospary týraly málimdeme Belgrad ortalyǵyndaǵy jappai narazylyqtar men tártipsizdikterge sebep boldy. Narazylyqqa shyǵýshylar politsiia kordondaryna shabýyldap, avtomobilder men qoqys jáshikterin órtedi. Parlament ǵimaratynyń aldynda bes myńǵa jýyq adam jinaldy, olardyń oppozitsiialyq belsendiler basqarǵan bir bóligi ǵimaratqa basa-kóktep kirdi;
Sonymen qatar, EO-da ekonomikalyq belsendilik tómendep jatyr. Sarapshylar Eýropa ekonomikasynyń osy jyly 8,3%-ǵa quldyraǵanyn jáne kelesi jyly 5,8%-y qalpyna keletinin boljap otyr (sáýirdegi boljamda -7,4% jáne +6,1% boldy);
- AQSh. AQSh-tyń bas epidemiology Entoni Faýchi AQSh koronavirýstyń alǵashqy tolqynynda «tize búgip» qaldy dep sanaidy. AQSh-ta koronavirýstan kóz jumǵandar sany dúisenbi kúni 130 myń adamnan asty, indetke shaldyqqandar 3 mln-ǵa jýyqtady. Shekteýler ishinara alynyp tastalǵannan keiin keibir shtattardaǵy aýrýhanalar lyq toldy;
- Aýstraliia. Melbýrn qalasynda koronavirýsqa bailanysty alty aptalyq lokdaýn engiziledi jáne adam kóp qonystanǵan Viktoriia men Jańa Ońtústik Ýels arasyndaǵy shekara belgisiz merzimge jabylady.
Osynaý kúrdeli kezeńde Qazaqstanda indetpen ymyrasyz kúres júrgizip jatyr. Kúni keshe Memleket basshysy Qasym-Jomart Toqaev respýblikalyq telearnalar arqyly elimizde qalyptasqan ahýalǵa bailanysty úndeý jariialaǵan bolatyn.
Prezident otandastarymyzdy halqymyzdyń basyna túsken synaq aldynda qaisarlyqqa, sabyr men jaýapkershilikke shaqyrdy.
