QR Prezidenti Qasym-Jomart Toqaev Tarazda ótip jatqan «Qazirgi kezeńdegi etnosaralyq kelisim: tájiribe jáne keleshektegi mindetter» atty halyqaralyq konferentsiiaǵa qatysýshylaryna úndeý joldady, dep habarlaidy QazAqparat.
«Jalpyulttyq birlik – Qazaqstannyń barlyq jetistikteriniń bastaýynda turatyn baǵa jetpes bailyǵymyz. Tuńǵysh Prezidentimiz – Elbasy Nursultan Ábishuly Nazarbaevtyń basshylyǵymen elimizde etnosaralyq kelisimniń ózindik modeli qalyptasty. Búkil álem moiyndaǵan osy úlgi barsha etnos jáne konfessiia ókilderin uiystyrýǵa, mádenietter men tilderdi ózara úilesimdi damytýǵa negizdelgen. Qazaqstan óziniń ulttyq biregeiliginiń negizi sanalatyn «birligimiz – áralýandyqta» degen qaǵidatty berik ustanyp keledi. Biz halqymyzdyń yrysty yntymaǵy men jasampaz eńbeginiń arqasynda Táýelsizdigimizdi nyǵaityp, qýatty memleket qurdyq», -delingen Prezident úndeýinde.
Memleket basshysynyń aitýynsha, jahandyq jáne óńirlik deńgeidegi jańa syn-qaterler jaǵdaiynda el birligin nyǵaitýdyń mańyzy arta tústi.
«Adamzat áli kúnge deiin tózimsizdik pen ksenofobiiadan aryla almai otyr. Kóptegen memlekette etnosaralyq sipattaǵy áleýmettik shielenis órship barady. Sondyqtan, halyqaralyq qaýymdastyqtyń aldynda osy túitkildi máseleni sheshýdiń tiimdi joldaryn izdeý, qoǵamdyq damýdyń jańa inkliýzivti modelin ázirleý mindetteri tur. Bul rette sarapshylar men kásibi zertteýshilerdiń ǵylymi ustanymnan ainymai, belsendi jumys isteýi asa mańyzdy. Konferentsiiaǵa qatysýshylar tyń ideia usynyp, óz tájiribelerin bólisip, syndarly suhbat qurady dep senemin. Eńbekterińiz jemisti bolsyn!», - dep tolyqtyrylǵan úndeý mátini.
