2019 jyldyń 24-27 sáýirinde «Kórme» ortalyǵynda «Eurasian Book Fair-2019» kezekti Eýraziialyq halyqaralyq kitap jármeńkesi ótedi, dep habarlaidy QazAqparat tilshisi.
Kórme-jármeńkege alys jáne jaqyn shet elderden - Resei, Ázerbaijan, Tájikstan, Armeniia, Qyrǵyzstan, Túrkiia, Qytai, Iran, Polsha, Belgiia, Latviia, Ýkraina jáne Ózbekstan syndy 13 memleketten 90 kompaniia qatysady. Kitaptarmen birge atalǵan kórmege sirek kezdesetin qoljazbalar da qoiylmaq.
«Qazirgi ýaqytta Ulttyq akademiialyq kitaphanada 13 myńnan astam sirek kitaptar men qoljazbalar saqtaýly. Qorymyzdyń eń úzdik eksponattarynyń biri - 1532 jyly kórsetilgen eski latyn qarpinde jazylǵan qoljazba. Bul kitaptyń muqabasy adam terisinen jasalǵan, sondyqtan kórmege kelýshilerdiń barlyǵy osy kitapqa qyzyǵýshylyq tanytyp otyr. Kórmede atyshýly kitaptyń qasyna kúzet qoiylady», - dedi Ulttyq akademiialyq kitaphana direktory Úmithan Dáýrenbekqyzy Ortalyq kommýnikatsiialar qyzmetinde ótken baspasóz máslihatynda.
Sonymen birge, sirek kezdesetin kitaptar arasynda Parsy, Úndistan, Qytai jáne Japoniianyń túpnusqa eńbekterinen alynǵan 1735 jyly shyǵarylǵan qytai oishyldarynyń kitaby bar.
«Bul kitap úsh danada jaryq kórdi, olardyń biri Lývrde, ekinshisi - Qazaqstanda saqtalsa, úshinshi - belgisiz oqyrmannyń qolynda», - dedi ol.
Aita keteiik, jyl saiyn Halyqaralyq kitap jármeńkesi kitaptardy nasihattaý, qatysýshy elderdiń ádebi muralaryn damytý jáne oqý mádenietin qalyptastyrý maqsatynda ótedi. Kórme aiasynda 150-den astam is-shara uiymdastyrylmaq. Kórme kelýshilerine ádebi ekskýrsiialar, jumbaq poetikalyq marshrýttar, avtorlarmen, baspagerlermen, sýretshilermen kezdesýler uiymdastyrylady.
