Almaty oblysynyń tártip saqshylary adam saýdasynyń aldyn alý boiynsha túsindirý jumystaryn júrgizdi, dep habarlaidy «Ult aqparat» Almaty oblystyq politsiia departamentiniń baspasóz qyzmetine silteme jasap.
Qarasai aýdanyq Politsiia basqaramasy Jergilikti politsiia qyzmeti bólimi Áielderdi zorlyq - zombylyqtan qorǵaý tobynyń inspektorlary «Rodnik» Qoǵamdyq Qory qyzmetkerlerimen birlese, Almaty oblysy Qarasai aýdanynyń óńirdegi eń úlken migranttar kelip-ketetin «Altynorda» bazaryna qarasty avtobekette adam saýdasynyń aldyn alý maqsatynda túsindirý jumysyn ótkizdi.
Atalǵan is - shara AQSh-tyń memlekettik departamentiniń qarjylyq qoldaýymen «Sana sezim» áielder bastamalarynyń quqyqtyq ortalyǵy Qoǵamdyq Birlestiginiń «Azamattyq qoǵam uiymdarynyń áleýetin arttyrý arqyly adam saýdasyna qarsy birge turý» jobasy aiasynda ótti.
Shara barysynda qiyn jaǵdaiǵa tap bolǵan migrant qaida habarlasyp, nendei kómek alýyna bolatyny, nege basa nazar aýdarý kerektigi týraly aqparattar berildi. Sondai-aq, avtobekette jolaýshy tasymaldaityn kólikterdiń júrgizýshilerine jáne kelýshilerge aqparattyq ónimder taratyldy.
Túsindirý jumystary barysynda 200-den asa aqparattyq kitapshalar taratylǵan.
Aita ketsek, statistika boiynsha elimizde adam saýdasy boiynsha 3 jylda 1100 qylmys tirkelgen. 242 adam adam saýdasymen ainalysqaný úshin sottaldy. Desek te mamandar Qazaqstanda bul qylmys jyldan jylǵa azaiyp kele jatqanyn aitady.
Adam saýdasy – adamnyń qadir-qasieti men jahandyq qaýipsizdikke qaýip tóndiretin asa aýyr qylmys. Adam saýdasy zań ústemdigin álsiretedi, halyqaralyq qaqtyǵystar týǵyzyp, turaqsyzdyqty kúsheitýi múmkin. Eń soraqysy, álem boiynsha shamamen 25 million adamdy qurban etýdi bizneske ainaldyrǵan transulttyq qylmystyq uiymdardy baiytady.
