Abai oblysy Aiagóz aýdanynda ózen sýy kóterilip, kópirdi qiratyp ketti.
Qazirgi ýaqytta Aiagóz aýdanynyń ákimdigi jergilikti aýqymdaǵy tótenshe jaǵdai jariialady.
«Jergilikti mańyzy bar «Aiagóz-Bozai» jolynyń 20 shaqyrymynda Aiagóz ózenindegi sý deńgeiiniń kóterilýine bailanysty kópirdiń jol tósemi shaiylyp, bir bóligi qirady. Ázirge kólik qatynasy toqtatyldy. Sonymen qatar basqa ainalma kólik joldary arqyly eldi mekenmen bailanysty qalpyna keltirý jumystary júrgizilýde», - dep habarlady óńir ákimdiginen.
Politsiia departamentiniń qyzmetkerleri shekteý belgilerin qoiyp, kezekshilik uiymdastyrdy.
«Halyqty Aiagóz ózeni arqyly ótkizý úshin TJD qyzmetkerleri jiberildi. Olar qajet bolǵan jaǵdaida júzý quraldarynyń kómegimen azamattardy ótkizip otyrady», - delingen habarlamada.
