Foto: Abai oblysy baspasóz qyzmeti
Abai oblysynda jańa Konstitýtsiiany qabyldaý jónindegi respýblikalyq referendýmǵa daýys berý jalǵasyp jatyr. Bul týraly oblys ákiminiń baspasóz qyzmetine silteme jasap Ult.kz habarlaidy.
Oblys ákimi Berik Ýáli Semei qalasyndaǵy Meditsinalyq ýniversitet ǵimaratynda ornalasqan №93 referendým ýchaskesine baryp, óz tańdaýyn jasady. Aimaq basshysy bul kúnniń el úshin mańyzy erekshe ekenin atap ótip, Abai eliniń jurtshylyǵy azamattyq belsendilik tanytatynyna senim bildirdi.
Oblys aýmaǵynda barlyǵy 465 referendým ýchaskesi jumys istep jatyr. Onyń – 429-y ashyq, 36-sy – jabyq ýchaske. Oblys boiynsha 400 151 sailaýshy daýys berýge quqyly. Ashyq ýchaskelerdiń barlyǵynda turǵyndar úshin mádeni is-sharalar, jármeńkeler men túrli aktsiialar uiymdastyrylǵan.
Referendým ýchaskelerinde daýys berýshilerge qolaily jaǵdai jasalǵan. Ýchaskeler qajetti infraqurylymmen jabdyqtalyp, daýys berý protsesi belgilengen tártippen ótýde. Ýchaskelerde pandýstar ornatylyp, arnaiy kórsetkishter men yńǵaily daýys berý kabinalary qarastyrylǵan. Qajet bolǵan jaǵdaida ýchaskelik komissiia músheleri azamattarǵa aqparattyq kómek kórsetedi. Densaýlyǵyna bailanysty ýchaskege kele almaityn azamattar úshin tasymaldy jáshik arqyly úide daýys berý múmkindigi uiymdastyrylǵan. Óńirde 2164 múmkindigi shekteýli azamattyń derekteri naqtylanyp, olardyń qai ýchaskege tirkelgeni tekserilgen.
Foto: Abai oblysy baspasóz qyzmeti
Referendýmdy ótkizýge óńirde bir oblystyq, eki qalalyq, 10 aýdandyq jáne 465 ýchaskelik komissiia qatysýda. Komissiialardyń quramynda 3254 adam jumys isteidi. Daiyndyq kezeńinde olardyń barlyǵy arnaiy oqytýdan ótti.
Oblysta búgin 28 invataksi jumys isteidi. Onyń ishinde Semei qalasynda 21 arnaiy kólik qyzmet kórsetedi. Budan bólek 6 sýrdoaýdarmashy jáne áleýmettik qyzmetkerler tartylǵan.
