Balalar ombýdsmeni Arýjan Sain Abai aýylynda zorlanǵan balanyń turatyn jaǵdaiyna qatysty jýrnalisterdiń synyna jaýap berdi, - dep habarlaidy Tengrinews.kz.
Buǵan deiin The Village Kazakhstan tilshileri jariialanym aldynda birneshe ret Arýjan Sain ókilderimen habarlasyp, suraqtarǵa jaýap berýin suraǵanyn, biraq olarǵa "ombýdsmenniń eski suhbattaryna siltemeler ǵana jiberilgenin" habarlaǵan bolatyn.
"Ásem Japisheva men Malika Muhanova shynymen bizben bailanysqa shyǵyp, týystarynyń, tergeýshi jáne sarapshylardyń bailanys nómirin surady. Biz ony ruqsatsyz jiberýge quqymyz joq, al balanyń anasy BAQ-pen bailanysqa úzildi-kesildi qarsy. Ásem Japishevaǵa suraqtar jiberýdi usyndyq, biz olardy anasyna nemese advokatqa osy joba aiasynda jumys isteýdi qarastyrýyn suraý úshin jiberýge daiyn boldyq. Kez kelgen jaǵdaida sheshimdi anasy aitýshy edi. Ásem Japisheva tarapynan suraqtar túsken joq. Tergeýshi bas tartty, óitkeni onyń aqparatty jariialaýǵa quqyǵy joq. Biz saraptamaǵa tartqan sarapshylar aqparatty jariialai almaidy", - dedi Arýjan Sain.
Arýjan Sainniń sózinshe, 1 qyrkúiekte bala Almatyda anasymen birge mektepke barǵan.
Ájesi de Tengrinews.kz tilshisine nemeresi bul úide emes, Almatyda turyp jatqanyn aitty.
"Bala bul jerde múldem turmaidy. Úsh aiǵa demalysqa kelgeni ras. Sol 2018 jyldyń naýryzynda ketip, sodan kelgen joq. Qazir Almatyda turyp jatyr, mektepte oqidy. (...) Nemerem úsh ai demalysta kelýge qaqy bar. Bireýge ziiany tigen joq, bári óz baqylaýymda, ózim alyp júrdim", - deidi ol.
Jýrnalist Ásem Japisheva Aibat jańylyqtar qyzmetine bergen suhbatynda balanyń aýylda ýaqytsha turýy da psihologiialyq jaraqat ákeletinin atap ótti.
Otbasy úshin turǵyn úi máselesi qalai sheshildi?
"Sot aiaqtalǵannan beri ana men bala erikti tegin bergen páterde turady. Kommýnaldyq shyǵyndardy da erikti tóleidi. Bala turǵylyqty jeri boiynsha mektep pen emhanaǵa bara alýy úshin ol anasy men balany osy páterge tirkegen", - dep túsindirdi Arýjan Sain.
Buǵan deiin The Village Kazakhstan tilshileri ájesi men anasy balamen birge eriktiniń páterinen kóship ketkenin, turǵyn úidi ózderi jaldap turatynyn málimdegen bolatyn.
"Maqala shyqqannan keiin biz anamen bailanysqa shyqtyq, ol sol páterde turatynyn rastady jáne 1 qyrkúiekte bala mektepke bardy. Eriktimen biz únemi bailanystamyz, olar kóship ketse, biz biletin edik. Maqaladan keiin onymen de bailanysqa shyqtyq, ana men bala páterinde turatynyn rastady. Jalpy, óte túsiniksiz jaǵdai", - dedi Arýjan Sain.
Balanyń ájesi Abaida qaldy. Ol Tengrinews.kz jýrnalisine materialdyq kómekke muqtaj emes ekenin, biraq olardyń otbasyn sottalǵan zorlaýshynyń anasy mazalaitynyn aitty.
Buǵan deiin The Village Kazakhstan tilshileri áiel mas kúide pyshaqpen sol úige baryp, ájesine qaýip tóndiretinin habarlaǵan bolatyn. Keiin quqyqqorǵaýshy Lázzat Raqysheva osy sózdi rastaityn video jariialady.
Aita keteiik, jýrnalister Arýjan Sainnen 2018 jyly "Otbasyǵa turǵyn úi satyp alýǵa aqsha jinaldy ma?" dep surady.
"Biz úige aqsha jinaǵyn emespiz. Otbasynyń ótinishi boiynsha 2018 jyly páterdi satý týraly habarlandyrý jariialadyq. Olar bul aqshaǵa ipoteka boiynsha jarna salyp, ájesi men tátesin kóshirgisi keldi. Páterdi sata almadyq", - dedi Sain.
Balanyń otbasyna qysym kórsetildi me?
Áje Tengrinews.kz tilshisimen suhbatta sheneýnikterden eshqandai qysym joq ekenin atap ótti, biraq áieldiń politsiiadan kóńili qalǵan.
"Sheneýnikter qysym kórsetip jatqan joq. Men olardan járdem surap barsam, politsiiaǵa bar deidi. Al men politsiiaǵa barǵym kelmeidi. Men politsiiadan kóńilim qalǵan. Balany zorlaǵanda alty ai boiy eshkim járdem bermegen maǵan. Tipti maǵan aryz jazdyrmaǵan. Qoryqqanymnan aryz jaza almai 6 ai júrgenmin", - deidi ol.
"Biz maqalada aitylǵan barlyq nársege kelisemiz. Ásirese kei adamdar men sheneýnikterdiń jaýapkershiligine qatysty. Sonymen qatar, biz oblys ákimine de, respýblikalyq memlekettik organdarǵa da osy másele boiynsha júgindik, biraq eshqandai shara qoldanylmady", - dedi Arýjan Sain.
Tengrinews.kz tilshisi balalar ombýdsmeninen "The Village Kazakshtan jýrnalisterimen kezdesýge daiynsyz ba?" dep surady.
"Olar qalasa, ózderi habarlasady dep oilaimyn. Meniń telefonymdy bilesizder", - dedi ol.
Ombýdsmen bul másele boiynsha jariialanymdardy toqtatýdy surady, óitkeni ár material bala men onyń týystaryna psihologiialyq jaraqat ákeledi.
"Zorlyq-zombylyq qurbany bolǵan balalar muny Internetten kóredi, oqidy. Olar sol sezimdi qaita bastan keshiredi. Balanyń kim ekeni aitylmasa da, sezimdi jeńý qiyn. Balaǵa ǵana emes, ata-analarǵa da. Sondyqtan biz barlyq osyndai kómekti jariialanymdarsyz, zańdy, quqyqtyq jolmen barynsha durys kórsetýge tyrysamyz. Mundai ister bizde az emes", - dedi Arýjan Sain.
Al Ásem Japisheva Aibat__kz-ke bergen suhbatynda The Village Kazakhstan tilshileri osy materialdy jáne balalarǵa qatysty zorlyq-zombylyq týraly basqa da birqatar maqalany zorlyq-zombylyqqa kináli barlyq adamdy, sondai-aq osyndai qylmystardy japqan sheneýnikterdi barabar jazalaýǵa qol jetkizý úshin jariialaitynyn túsindirdi.
