Prezident Ákimshiligi Basshysynyń birinshi orynbasary Dáýren Abaev «Ashyq dialog» alańynda vaktsinalaý isindegi memlekettiń ustanymy týraly pikir bildirdi, dep habarlaidy "Ult aqparat".
«Bul jerde jalǵyz jol bar. Memleket ekpe alǵan azamattar úshin áleýmettik basymdyqtardyń tizimin birtindep, asyra silteýsiz keńeite beredi. Qoǵamdyq oryndarǵa barý, saparǵa shyǵý múmkindikteri ekpe alǵandarda kóbirek bolady. Adam quqyqtaryn buzý máselesine kelsek, qazir bul bizdiń elde ǵana emes, búkil álemde ózekti bolyp tur. Batys baspasózin oqysańyz, ol jaqta ekpe almaǵan adamdardy jumystan qýyp jatyr. Biraq eshkim konstitýtsiialyq quqyǵy shektelgenin aityp, shaǵymdanyp jatqan joq. Kerisinshe, vaktsinatsiia adamnyń qaýipsizdigimen bailanysty bazalyq quqyǵyn qorǵaidy», - dedi Dáýren Abaev.
Prezident Ákimshiligi Basshysynyń orynbasary skeptikterdiń vaktsinatsiiaǵa qarsy keltirip júrgen argýmentterin mifke teńedi.
«Men olardy argýment degenshe – mif der edim. Saýalnamalarǵa súiensek, bizde vaktsinalaýǵa qatysty skeptitsizm Afrika elderine qaraǵanda jaqsyraq. Mysaly, kóp adamdar dini paiymyna bailanysty vaktsina alǵysy kelmeidi. Biraq bizdiń eldegi barlyq konfessiialardyń basshylary vaktsina men dini qaǵidalar arasynda qaishylyq joq ekenin rastady. Álemdegi eń bir dini memleket – Saýd Arabiiasy. Sol eldiń ózinde qajylyqqa barý úshin vaktsina pasportyn suraidy», - dedi Dáýren Abaev.
Sondai-aq, ol áleýmettik jelide vaktsina alsa da, virýs juqtyrǵan adamdar týraly taraǵan aqparattarǵa túsinik berdi.
«Iá, shynymen ondai jaittar bar. Birinshiden, ondai adamdar syrqatty áldeqaida jeńil ótkerip jatyr. Ekinshiden, vaktsinatsiia kórsetkishi joǵary elderdiń satistikasy virýs juqtyrǵan 1000 adamnyń beseýi ǵana vaktsina salǵyzyp úlergenin kórsetip otyr. Áleýmettik jelidegi qorqynyshty aqparattardyń kóbi – feik. Jýrnalister sonyń bárin joqqa shyǵaryp úlgermei jatyr. Bir feiktiń betin ashsa, ornyna taǵy úsheýi paida bola ketedi. Sondyqtan vaktsinalaýdyń paidasyn túsindirý isinde júieli jumys qajet», - dedi Dáýren Abaev.
