Osy kúnderi «Bazz Laiter» mýltfilminiń Qazaqstanda kórsetilýine qatysty qyzý talqylaý júrip jatyr. Pikir ekige bólinedi, qarsylar men qoldaýshylar. QR Mádeniet jáne sport ministri Dáýren Abaev atalǵan týyndyny el aýmaǵynda prokatqa shyǵarmaýdyń sebebin túsindirdi, dep habarlaidy QazAqparat.
«Elimizde tsenzýraǵa tyiym salynǵan. Sondyqtan ministrlik «Bazz Laiter» animatsiialyq filmin Qazaqstanda kórsetýge tyiym salǵan joq. Meniń osyǵan deiingi jazbam tyiym salý týraly emes. Men mýltfilm prokatqa shyqpaidy dedim. Odan ári BAQ jáne birqatar bloger óz betinshe túiindedi. Osy oraida birneshe jaǵdaidy eskergen jón. Aldymen elimizde atalǵan mýltfilmdi kórsetýge tek prodiýser Nurtas Adambai ǵana qarsy shyqty degen birqatar medialyq tulǵalardyń málimdemesi – manipýliatsiia. Jelide «Bazz Laiter» mýltfilmin kórsetýge tyiym salýdy talap etken petitsiia jariialandy. Petitsiia 35 adamnyń qolyn jinap, 4 myńǵa jýyq adam oǵan qarsy shyqqan», - dep jazdy Dáýren Abaev Facebook paraqshasynda.
Ministrdiń aitýynsha, atalǵan máselege qatysty birneshe óńirde miting ótkizýge ótinish túsken.
«Ministrlik pen jergilikti atqarýshy organdardyń atyna azamattardan kóptegen ótinish tústi. Máseleni jaýapsyz qaldyrý, el azamattarynyń únine qulaq aspaý degen sóz. Ashyq Úkimet sol úshin de quryldy. Ekinshiden, azamattar ótinishiniń taldaý nátijesi kórsetip otyrǵandai olardy bir jynystylardyń bir-birin súigeni ǵana tolǵandyryp otyrǵan joq. Olardy filmdegi bir jynystylardyń otbasyn quryp, urpaq jalǵastyryp, ómirlik tártipke ainaldyrý faktisiniń oryn alýy alańdatyp otyr», - deidi ol.
Sondai-aq, vedomstvo basshysy ministrliktiń siýjet etikasyn baǵalai almaityndyǵyn aityp, bastysy zańǵa qaishy kelmeý kerektigin eskertti.
Abaev atalǵan jaitqa qatysty qoǵam únin jaýapsyz qaldyra almaityndyǵyn da tilge tiek etti.
«Úshinshiden, joǵaryda aitylǵan jaǵdailarǵa taldaýdan soń ministrlik Qazaqstan aýmaǵynda kinokartina prokatymen ainalysýshylarmen birneshe ret keńes ótkizdi. Naqty usynymdar aityldy. Kórsetilimge tyiym bolǵan joq. Filmder prokaty bul biznes. Al biznes kez kelgen sátte táýekeldiń bolý múmkindigin eskeredi. Joǵaryda atalǵan barlyq faktordy eskere kele filmdi prokatqa shyǵarmaý týraly sheshim qabyldandy», - dep túiindedi ministr.
Eske salsaq, keshe Mádeniet jáne sport ministri Dáýren Abaev qyzý talqyǵa túsken «Bazz Laiter» animatsiialyq filmi Qazaqstan kinoteatrlarynda kórsetilmeitinin málimdedi.
