Biyl kolledjderde tegin kásiptik-tehnikalyq oqýǵa 95 myń adam qabyldandy. Bul týraly QR Bilim jáne ǵylym birinshi vitse-ministri Sholpan Karinova aityp berdi, dep habarlaidy QazAqparat.
«Kolledjderge kelsek, «tegin kásiptik-tehnikalyq bilim berý» jobasyn iske asyrý jalǵasýda. Joba aiasynda biyl kolledjderge birinshi kýrsqa 95 myń stýdent qabyldandy. Biyldan bastap kolledjderdiń akademiialyq derbestigi keńeitildi, ol jumys berýshilerdiń qatysýymen jáne eńbek naryǵynyń talaptary boiynsha bilim berý baǵdarlamalaryn derbes ázirleýge múmkindik beredi. 180 kolledjdi «Jas maman» jobasy boiynsha jabdyqtaý aiaqtalyp keledi. Jańa oqý jylynda kolledj stýdentteri mektep oqýshylary siiaqty shtattyq oqytý formatyna kóshti. Bul rette teoriialyq, zerthanalyq, praktikalyq sabaqtar, kásiptik praktika qalypty rejimde júrgiziledi jáne kolledjder pánderdiń 20%-y boiynsha qashyqtan oqytýdy uiymdastyrýǵa múmkindigi bar», - dedi vitse-ministr Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, kolledjderde stýdentterdiń bir ýaqytta bolýyn shekteý úshin teoriialyq jáne praktikalyq sabaqtardyń aýystyryp turý uiymdastyrylǵan. Barlyq kolledjder men jataqhanalarda Ashyq júiesi ornatylǵan.
