Atyraý oblysynda 9 adam qaza tapqan jol-kólik apatyna qatysty jańa málimetter paida boldy, dep habarlaidy "Ult aqparat".
4 qazan kúni Atyraý oblysyndaǵy Atyraý-Aqtóbe tasjolynda eki kólik soqtyǵysyp, saldarynan eki kóliktiń júrgizýshisi, jolaýshylary – barlyǵy 9 adam túgeldei kóz jumǵan bolatyn. QR Ishki ister ministri Erlan Turǵymbaev oqiǵa boiynsha tergeý bastalǵanyn aitty.
Oblystyq Politsiia departamenti baspasóz qyzmetiniń málimetinshe, «Renault Duster» kóliginde Maqat aýdanynyń turǵyndary bolǵan. Kólikti 57 jastaǵy júrgizýshi basqarǵan. Salonda 55 jastaǵy áieli men 15 jastaǵy uly, sondai-aq 36 jastaǵy týysy bolǵan. Al, «Geely» kóliginiń júrgizýshisi Atyraý qalasyna irgeles ornalasqan Tomarly aýylynyń 36 jastaǵy turǵyny ekeni anyqtaldy. Kólikte Qyzylqoǵa aýdanynyń Jangeldin aýylynan 67 jastaǵy áiel men Atyraý qalasynyń úsh turǵyny otyrǵan. Olar – 63 jastaǵy er adam men 63 jáne 38 jastaǵy áielder. Barlyǵy – týysqandar.
Atalǵan faktige qatysty QR Qylmystyq kodeksiniń 345-babynyń 4-bóligimen (Eki nemese odan da kóp adamnyń ólimine ákep soqqan, kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy) qylmystyq is qozǵalǵan.
